Ўзбекистон президенти матбуот котиби Шерзод Асадов Абдусалом Азизов билан боғлиқ вазиятга изоҳ берди.
Маълум қилинишича, Ўзбекистон президентининг тегишли фармонлари билан:
- Баҳодир Қурбонов мудофаа вазири лавозимидан озод этилди ва Давлат хавфсизлик хизмати раиси лавозимига тайинланди;
- Шуҳрат Холмуҳамедов мудофаа вазирининг биринчи ўринбосари – Қуролли кучлар Бош штаби бошлиғи лавозимидан озод этилди ва мудофаа вазири лавозимига тайинланди;
- Абдусалом Азизов Давлат хавфсизлик хизмати раиси лавозимидан озод этилди ва Президент ҳузуридаги Хавфсизлик кенгаши котибияти ихтиёрига ўтказилди.
Бундан кўринади-ки, Абдусалом Азизовнинг Президент ҳузуридаги Хавфсизлик кенгаши котибияти ихтиёрига ўтказилгани унинг бирор лавозимга тайинлангани ёки доимий ишга расмийлаштирилганини англатмайди.
Мудофаа вазирлиги матбуот хизматининг маълум қилишича, Давлат хавфсизлик хизмати раиси этиб тайинланган Баҳодир Қурбоновга навбатдаги махсус генерал-полковник ҳарбий унвони берилди. У 2019 йил февралидан шу кунга қадар Ўзбекистон мудофаа вазири лавозимида фаолият юритиб келаётган эди.
Абдусалом Азизов ҳақида
Абдусалом Азизов (1960 йилда туғилган) 2019 йил февралидан буён Давлат хавфсизлик хизмати раҳбари лавозимида ишлаб келаётганди. Бунгача у 2017 йилнинг сентябридан Мудофаа вазирлигини бошқариб келган.
2002—2006 йилларда “Ўзбекнефтгаз” миллий холдинг компанияси бошқаруви раиси бўлган.
2006 йил сентябридан 2008 йил ноябригача “Ўзнефтмаҳсулот” корхонасини (“Ўзбекнефтгаз” шўба корхонаси) бошқарган.
2008 йилнинг ноябрь ойида у Ички ишлар вазирлигига қайтиб, ўша йилнинг ноябрь декабрь ойларида Ички ишлар вазири ўринбосари, 2008 йилнинг декабридан 2009 йилнинг декабрига қадар — Ички ишлар вазирининг биринчи ўринбосари лавозимларида фаолият юритган.
2009—2017 йилларда Жиззах вилояти ИИБ бошлиғи лавозимида ишлаган.
Изоҳ (0)