Тошкентда самолёт бортида йўловчи аёлга шаҳвоний шилқимлик қилган эркак 3 суткага қамалди.
“Дарё” танишиб чиққан суд ҳужжатига кўра, маст ҳолдаги 40 ёшли эркак 2025 йил 21 июль куни Тошкент халқаро аэропортининг учиб келиш йўналишида Москва—Тошкент рейси билан учиб келаётган самолётда ўзи билан битта бортда кетаётган йўловчи аёл Л.М.га шаҳвоний шилқимлик қилган.
Аёл эса эркакка бу ҳаракатларни тўхтатишни ва ўзини тўғри тутиши кераклигини айтишига қарамасдан, у ўз ҳаракатларини давом эттириб, шаҳвоний хусусиятга эга бўлган ҳаракатларни содир этгани, яъни шаҳвоний шилқимлик қилгани аниқланган.
Эркакнинг бу ҳаракатларни содир этганини судда гувоҳлик берган борткузатувчи ҳам тасдиқлаган.
Суд мажлисида эркак айбини тан олиб, ўша куни 3 бакал пиво ичгани сабаб спиртли ичимлик таъсирида бўлгани, парвоз вақтида ўзини билмасдан аёлга шаҳвоний шилқимлик қилганини, маст бўлгани учун ҳаракатларининг оқибатини тушунмаганини айтган. Қилмишидан пушаймонлигини, бошқа бу ҳолат такрорланмаслигини, кечирим сўраганини баён қилиб, унга нисбатан енгиллик беришни сўраган.
Суд ҳукми билан унга Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисми билан 3 сутка маъмурий қамоқ жазоси тайинланган. Жазо тайинлашда қилмишидан чин кўнгилдан пушаймонлиги, ҳуқуқбузарлик хусусияти, оилавий аҳволи, айбдорлик даражаси, жавобгарликни енгиллаштирувчи ва оғирлаштирувчи ҳолатлар ҳисобга олинган.
Суд маъмурий қамоққа олинган шахсни сақлаш харажатларидан ҳам озод қилишни лозим топган.
Шаҳвоний шилқимлик учун кодексда БҲМнинг 2 бараваридан 5 бараваригача миқдорда жарима ёки 5 суткагача маъмурий қамоқ жазоси белгиланган.
Изоҳ (0)