Яманнинг “Ансоруллоҳ”, яъни ҳусийлар ҳаракати Тель-Авивдаги Бен Гурион халқаро аэропортига муваффақиятли зарба берилганини маълум қилди. Бу ҳақда Anadolu хабар берди.
Ҳусийлар вакили Яҳё Сарига кўра, операция гипертовушли “Фаластин-2” ракетаси ёрдамида амалга оширилган ва Лод шаҳридаги Бен Гурион аэропортга йўналтирилган.
Таъкидланишича, кўзланган мақсадга эришилган. Ҳужум оқибатида аэропорт фаолияти тўхтаб қолган. Миллионлаб “сионистлар” бошпаналарга яширинишга мажбур бўлган.
Сари операцияни Фаластин халқини қўллаб-қувватлаш акти ва Исроил армиясининг Ғазо секторидаги ҳаракатларига жавоб деб атаган. Унинг таъкидлашича, Исроилга ҳужумлар тажовуз тўхтамагунча ва Ғазо сектори блокадаси бекор қилинмагунча давом этади. Баёнотда, шунингдек, ҳусий кучлари юзага келиши мумкин бўлган ҳодисалар бўйича шай ҳолатда экани қайд этилган.
Исроил армияси ҳаво ҳужумидан мудофаа тизимлари 6 июнь куни Ямандан учирилган ракетани уриб туширганини маълум қилган. Ҳусийлар Ғазо секторига давом этаётган ҳужумларга жавобан Исроилга мунтазам равишда ҳужумлар уюштирмоқда. Халқаро ташкилотларнинг таъкидлашича, бу ҳужумлардан асосан аёллар ва болалар азият чекмоқда.
Ғазода 2023 йил 7 октябрда ҳужумлар бошланганидан бери 193 мингдан ортиқ фаластинлик ҳалок бўлган ёки яраланган. 11 мингдан ортиқ одам бедарак йўқолган ва юз минглаб одамлар ўз уйларини ташлаб кетишга мажбур бўлган.
Изоҳ (0)