Қозоғистонлик UFC жангчиси Шавкат Раҳмоновнинг рафиқаси йўл-транспорт ҳодисасига учрагани ҳақида хабарлар тарқалди. Мазкур маълумотни Жамбил вилояти полиция департаменти матбуот хизмати тасдиқлаган, бироқ жабрланганлар шахси ошкор этилмаган. Бу ҳақда Zakon.kz нашри хабар берди.
Расмий маълумотларга кўра, ҳодиса 2025 йил 27 июль куни соат 08:50 да “Олмаота–Екатеринбург” йўлининг 299-километрида юз берган. Қарағанди вилоятидан Олмаота йўналиши бўйлаб ҳаракатланаётган Toyota Land Cruiser 200 русумли автомобиль ҳайдовчиси бошқарувни йўқотган ва машина ағдарилиб кетган.
Оқибатда икки йўловчи ҳалок бўлган, яна икки киши касалхонага ётқизилган. Воқеа юзасидан Жиноят кодексининг 345-моддаси 1-қисми (транспорт воситалари ҳаракати ёки уларни бошқариш қоидаларини бузиш) бўйича суриштирув ишлари бошланган.
Расмийлар жабрланганларнинг шахсини очиқламаган бўлса-да, ижтимоий тармоқларда тарқалган хабарларга кўра, автоҳалокатга учраганлар орасида Шавкат Раҳмоновнинг турмуш ўртоғи ҳам бўлган. Бироқ бу маълумотни спортчининг оила аъзолари ёки расмий манбалар ҳали тасдиқламаган.
Маълумот учун, Шавкат Раҳмонов профессионал фаолияти давомида 19 та жанг ўтказган ва уларнинг барчасида ғалаба қозонган. У 2020 йилдан буён UFC доирасида 7 марта октагонга чиқиб, барча жангларда рақибларини мағлуб этган.
Изоҳ (0)