Дониёр Ғаниев бошқа ишга ўтиши муносабати билан депутатлик фаолиятини якунлади

Олий Мажлис Қонунчилик палатаси депутати Дониёр Ғаниев депутатлик мандатини тугатишга, янги сайловларда номзодини илгари сурмасликка қарор қилди. Бу ҳақда у ўзининг Telegram каналида ёзиб қолдирди.

Сайловчилар билдирган ишончни оқлаш, уларнинг дарду ташвишларини, муаммо ва хоҳишларини парламент минбарига олиб чиқиш, қабул қилинган қонунларни адолатли ва инсонпарвар бўлишига ҳисса қўшиш, мурожаат қилган фуқароларга ёрдам бера олиш имконияти мен учун депутатликнинг энг катта шарафи бўлди. Бундай имконият ва бахт менга насиб қилганидан ҳар доим фахрланаман, деб ёзади Дониёр Ғаниев.

Депутатнинг таъкидлашича, инсон атрофидаги ўзгаришлар, реаллик билан ҳисоблашиши ҳамда ўз имконият ва қобилиятларини тўғри баҳолай олиши керак. “Гарчи депутат сифатида самарали фаолият олиб бордим, деб ўйласам-да, бу фаолиятда давом этиш ўзим учун ҳам, сайловчилар учун ҳам манфаатли бўлмаслигини тушуниб етдим. Менимча, ҳаётимда ўзгаришлар қилиш, янги челленж ва имкониятларни қарши олишнинг айни вақти”, дея қайд этади у.

Шу боис Дониёр Ғаниев депутатлик мандатини тугатишга, янги сайловларда номзодини илгари сурмасликка қарор қилган. Бундан кейинги фаолиятини у Вазирлар Маҳкамасида инвестиция йўналишида масъул ходим сифатида давом эттиради. Ғаниев депутатликдан аввал ҳам шу йўналишда фаолият юритган.

Менга ўз вакиллигини ишонган Марғилон округи сайловчиларига, фаолиятимни эътироф этиб, қўллаб-қувватлаган жамоатчилик фаоллари, ОАВ вакиллари ва кўплаб блогер дўстларимизга билдирилган ишонч ва қўллов учун миннатдорчилик билдираман.

Шунингдек, парламент йиғилишларида ҳар доим ўз фикримни айтишга имконият яратган Қонунчилик палатаси спикерига, ялпи ва фракция йиғилишларида қўллаб-қувватлаган ҳамкасб депутатларга ҳамда қонун лойиҳаларини такомиллаштиришда керак бўлса депутатлардан ҳам кўпроқ меҳнат қиладиган палата девони ходимларига ҳам алоҳида раҳмат айтаман, дейди Дониёр Ғаниев.

Дониёр Ғаниев Олий Мажлис Қонунчилик палатасининг фаол депутатларидан эди. У бир неча бор муаммоли масалалар ҳақида парламент минбаридан туриб гапирган ва ўз фикрларини очиқ айта олган. Хусусан, 2022 йилда унинг Молия вазирлигидан бюджетдан автомобиль корхоналари утилизация йиғимларини қоплаб бериш учун 225 миллиард сўм қўшимча субсидия берилиши қанчалик мантиқли экани ҳақида фикрлари, “Док-1 Макс” воқеасидан кейин сиёсий жавобгарлик кўрилмаётгани борасидаги танқидлари кенг муҳокамаларга сабаб бўлганди.