UFC енгил вазн тоифасининг (70 кг) иккинчи рақамли жангчиси, россиялик Арман Царукян амалдаги чемпион — испан-грузин аралаш жанг санъати устаси Илия Топурияга қарши жанг учун ярим миллион доллар пул тикишга тайёр эканлигини маълум қилди. Спортчи бу ҳақда Overdogs Podcast with Mike Perry подкастида айтиб ўтди.
Мен унинг мағлубиятига 500 минг доллар тикишга тайёрман. Агар ютсам — у менга, агар у ютса — мен унга шу пулни бераман. Илия бунга рози бўлса, мен ҳам жангга тайёрман, — дейди Царукян.
28 ёшли жангчи UFC’да 2019 йилдан бери иштирок этиб келмоқда. Арман бу вақт мобайнида промоушен доирасида 11 жанг ўтказиб, 9 та ғалаба ва 2 та мағлубият қайд этган.
Топурия эса ушбу вазн тоифасида чемпион ҳисобланади. У жорий йилнинг 29 июнь куни Лас-Вегасда бўлиб ўтган UFC 317 мусобақасида бразилиялик Чарльз Оливейрани нокаутга учратиб, UFC енгил вазн тоифасининг янги чемпионига айланди. Царукян эса ушбу камар учун асосий даъвогарлардан бири бўлиб турибди.
Изоҳ (0)