Ўзбекистонлик UFC жангчиси Богдан Гусковнинг эҳтимолий рақиблари маълум бўлди

Ўзбекистонлик UFC жангчиси Богдан Гусковнинг навбатдаги эҳтимолий рақиблари номи эълон қилинди. Бу ҳақда UFC матбуот хизмати маълумот берди.

Хабарга кўра, Гусковга қарши октагонга чиқиши мумкин бўлган спортчилар сифатида Волкан Оздемир, Жамол Ҳилл, Ян Блахович ва Ҳалил Раунтренинг номлари тилга олинган. Музокаралар ижобий якунланса, айнан шу жангчилардан бири ўзбекистонлик аралаш жанг санъати вакилининг навбатдаги рақибига айланиши мумкин.

Таъкидлаш жоизки, Богдан бу номлардан бири — Волкан Оздемир билан илгари жанг ўтказган. У ўзининг UFC’даги дебют жангида швейцариялик жангчига қарши октагонга чиқиб, имкониятни бой берган эди. Ҳозирда Оздемир ярим оғир вазн тоифасида Гусковдан бир поғона юқорида, 9-ўринда жойлашган.

Эҳтимолий рақиблар орасида энг юқори рейтингга эга жангчи Ҳалил Раунтре бўлиб, у UFC рейтингида 4-ўринда турибди. Ян Блахович 5-ўринда, Жамол Ҳилл эса 6-ўринни эгаллаб турибди.

Эслатиб ўтамиз, Богдан Гусков 26 июль куни Абу-Даби шаҳрида бўлиб ўтган UFC on ABC 9 турнири доирасида россиялик Никита Криловга қарши октагонга чиқиб, биринчи раунддаёқ техник нокаут эвазига ғалаба қозонганди. Ушбу натижадан сўнг Гусков UFC рейтингида уч поғона юқорилаб, 10-ўринни эгаллаб турибди.