Россия ҳарбий дронларини ишлаб чиқиш ва синовдан ўтказиш учун болалардан фойдаланмоқда. Бу ҳақда суриштирув натижаларига таяниб The Guardian хабар берди.
Суриштирувга кўра, болаларни бу жараёнга жалб этишда видеоўйинлар ва мусобақалардан фойдаланилмоқда. Аввалига ёшлар “Берлога” номли ўйинда қатнашади. Унда ўйинчилар “ақлли айиқлар” ролида дронлардан фойдаланиб, душман асаларилардан ҳимояланишга ҳаракат қилади. Юз минглаб бола ўйнайдиган бу ўйинда ғолиблар олий таълимга киришда имтиёзли балларга эга бўлади.
Шундан сўнг, энг иқтидорли ўқувчилар Big Chellenges каби мураккаб мусобақаларга йўналтирилади. Бу танловлар орқали уларни Россия мудофаа саноатида фаолият юритувчи компаниялар танлаб олади. Бу компанияларнинг аксарияти халқаро санкцияларга учраган.
Болалар турли хил дронлар учун тизим қисмларини моделлаштириш ишларида фаол қатнашмоқда. Мен камида бир нечтасини биламан, улар йирик компаниялар учун дрон қисмларини моделлаштирган, деган ўсмирлардан бири.
Россия президенти Владимир Путин урушнинг муҳим қисмига айланиб бораётган дронлар ишлаб чиқаришни кўпайтиришга чақирган. Бироқ дронлар жанги доимий равишда ўзгариб бормоқда. Чунки ҳар икки томон ҳам дронларга узоқроқ учиш ва электрон тўсиқ тизимларидан қочиш имконини берувчи янги технологияларни киритмоқда. Россия эса бу ҳаракатларда ёрдам бериш учун ёшлари орасидан энг ақлли технологик даҳоларини изламоқда.
Тhе Insider нашрининг ёзишича, танловларда қатнашган ва финал босқичига етиб борган ўқувчилар дрон технологиялари ҳарбий мақсадларда қўлланилишини билган.
Бизга бу уруш учун кераклигини айтиш ман этилганди, шунинг учун фуқаролик мақсадларидаги иловаларни ўйлаб топдик. Бу болалар дастури... Ҳар қандай лойиҳа, айниқса сиз мактаб ўқувчиси бўлсангиз, доимо икки томонлама мақсадга эга бўлиши керак. Бу мен ҳар бир танловда кузатган ёзилмаган қоида, деди улардан бири.
Фронтда энг ҳалокатли қурол ФПВ дронлари бўлса-да, Россия ва Украина узоқ масофали дронлардан кенг фойдаланмоқда. Россия ҳар тунда Украинага камикадзе дронларини учиради. Уруш пайтида қонуний нишонга олиниши мумкин бўлган ҳарбий объектларда болаларни ишлатиш кўплаб халқаро конвенцияларни бузади.
Изоҳ (0)