“Манчестер Сити” клуби 22 ёшли дарвозабон Жеймс Траффорднинг трансфери бўйича “Бёрнли” билан келишувга эришди. Бу ҳақда инсайдер Фабрицио Романо ўзининг Х (собиқ Twitter) тармоғидаги саҳифаси орқали хабар берди.
Унга кўра, “шаҳарликлар” собиқ тарбияланувчиси учун “Бёрнли”га 27 миллион фунт стерлинг (тахминан 30,7 миллион евро) тўлайди. Трансфер расмийлашишидан аввал футболчи тиббий кўрикдан ўтади. Бу жараён келаси ҳафтага белгиланган.
Маълумот учун, Жеймс Траффорд фаолиятини “Манчестер Сити” тизимида бошлаган ва 2023 йил ёзида “Бёрнли” сафига қўшилган эди. Унинг клуб билан шартномаси 2027 йил ёзига қадар амал қилади. Transfermarkt порталига кўра, ёш посбоннинг қиймати 22 миллион еврони ташкил этади. Ушбу трансфер “Манчестер Сити”нинг келажакдаги режаларининг муҳим футболчиси сифатида баҳоланмоқда.
Траффорднинг қайтиши Эдерсон келажагига таъсир қилиши ҳам мумкин. ESPN нашри хабарига кўра, бразилиялик дарвозабон “шаҳарликлар” сафини тарк этиш эҳтимоли юқори. Сабаби унга Саудия Арабистонининг бир қанча клублари қизиқиш билдирмоқда.
Изоҳ (0)