“Manchester Siti” klubi 22 yoshli darvozabon Jeyms Traffordning transferi bo‘yicha “Byornli” bilan kelishuvga erishdi. Bu haqda insayder Fabrisio Romano o‘zining X (sobiq Twitter) tarmog‘idagi sahifasi orqali xabar berdi.
Unga ko‘ra, “shaharliklar” sobiq tarbiyalanuvchisi uchun “Byornli”ga 27 million funt sterling (taxminan 30,7 million yevro) to‘laydi. Transfer rasmiylashishidan avval futbolchi tibbiy ko‘rikdan o‘tadi. Bu jarayon kelasi haftaga belgilangan.
Ma’lumot uchun, Jeyms Trafford faoliyatini “Manchester Siti” tizimida boshlagan va 2023-yil yozida “Byornli” safiga qo‘shilgan edi. Uning klub bilan shartnomasi 2027-yil yoziga qadar amal qiladi. Transfermarkt portaliga ko‘ra, yosh posbonning qiymati 22 million yevroni tashkil etadi. Ushbu transfer “Manchester Siti”ning kelajakdagi rejalarining muhim futbolchisi sifatida baholanmoqda.
Traffordning qaytishi Ederson kelajagiga ta’sir qilishi ham mumkin. ESPN nashri xabariga ko‘ra, braziliyalik darvozabon “shaharliklar” safini tark etish ehtimoli yuqori. Sababi unga Saudiya Arabistonining bir qancha klublari qiziqish bildirmoqda.
Izoh (0)