Тошкент вилоятининг Бўстонлиқ туманида 30 июль куни Чорвоқ шамол электр станциясини қуриш лойиҳасига старт берилди. Бу ҳақда вилоят ҳокимлиги матбуот хизмати хабар берди.
Тадбирда Хитойнинг Ўзбекистондаги элчихонаси Иқтисодиёт ва тижорат бўлими маслаҳатчиси Сун Ян, масъул хитой компаниялари вакиллари, Энергетика вазири ўринбосари Умид Мамадаминов, Бўстонлиқ тумани ҳокими Жўрабек Аҳмедов ҳамда масъул раҳбар-ходимлар, маҳаллий фаоллар иштирок этди.
“Ўзбекгидроэнерго” АЖ матбуот хизматининг маълум қилишича, 2023 йил 17 октябрда Хитойнинг Шинжон-Уйғур автоном райони савдо департаменти кўмагида “Ўзбекгидроэнерго” АЖнинг биринчи ГРАНТ лойиҳаларини жалб қилиш доирасида Ўзбекистонда шамол электр станциясини қуриш грант лойиҳасини амалга ошириш бўйича ўзаро келишув меморандуми имзоланган. Хитойнинг Шинжон-Уйғур автоном райони савдо департаменти томонидан лойиҳани қурилиш ишларини олиб бориш учун ўтказилган тендерда ТBEA Cо., Ltd компанияси ғолиб бўлиб, бош пудратчи этиб танланган.
Бугунги кунда бош пудратчи томонидан Тошкент вилояти ҳокимининг 2025 йил 1 июлдаги тегишли қарори асосида ажратилган 10 гектарга тенг ерда (Бурчмулла ҳудудида) қурилиш ишлари олиб борилмоқда ҳамда Хитойдан олиб келинаётган замонавий технологик асбоб-ускуналарини босқичма-босқич монтаж қилиш ишлари давом эттирилмоқда.
Лойиҳанинг умумий қиймати 28 миллион АҚШ доллари бўлиб, қурилиш грант маблағлари ҳисобига амалга оширилади. Яъни Хитой томонидан шунча маблағ тўғридан-тўғри беғараз кўмак ажратилган.
Лойиҳани амалга ошириш муддати 2025—2026 йилларга режалаштирилган. Ушбу лойиҳа доирасида 20 МВт қувватга тенг шамол электр станциясини барпо этилади. Бунда йилига ўртача 50 млн кВт/соат электр энергияси ишлаб чиқарилади. Шу билан бирга, 30 та янги иш ўрни яратилади. Мазкур лойиҳа фойдаланишга топширилгандан сўнг, қарийб 20 минг хонадон электр энергия билан таъминланади.
Ушбу шамол электр станциялари орқали ишлаб чиқарилган электр энергияси йилига 811,1 минг метр куб табиий газ ёки 3,15 минг тонна кўмир тежаш имконини беради.
Изоҳ (0)