Камбағалликни қисқартириш ва бандлик вазирлиги расман ишлаётган пенсионерлар сонини очиқлади.
“Ягона миллий меҳнат тизими”дан олинган маълумотларга кўра, 27 август ҳолатига расман ишлаётган пенсионерлар сони 583 785 нафарни ташкил этмоқда. Шундан эркаклар 235 140 нафар (40,3 фоиз), аёллар 348 645 нафар (59,7 фоиз). Секторлар бўйича:
- Давлат ташкилотларида – 243 588 нафар (41,7 фоиз);
- Хусусий секторда – 340 197 нафар (58,3 фоиз).
Ҳудудлар кесимида топ-5:
- Тошкент шаҳри – 98 706 нафар (16,9 фоиз);
- Тошкент вилояти – 55 030 нафар (9,4 фоиз);
- Самарқанд вилояти – 50 429 нафар (8,6 фоиз);
- Андижон вилояти – 49 102 нафар (8,4 фоиз);
- Фарғона вилояти – 48 912 нафар (8,3 фоиз).
Президент фармони билан Ўзбекистонда 2024 йил 1 сентябрдан пенсия ва нафақалар миқдори 15 фоиз оширилади. 1 октябрдан давлат ташкилотлари ходимлари, хусусан, педагоглар (олий таълимдан ташқари) ва шифокорлар иш ҳақи 15 фоиз, бошқа ходимлар ойлиги 10 фоиз кўтарилади.
Жорий йилнинг биринчи ярмида Ўзбекистонда ўртача ойлик номинал ҳисобланган иш ҳақи 5 миллион 92 минг сўмни ташкил этди. Энг юқори ўртача иш ҳақи Тошкент шаҳри (8,4 миллион сўм) ва Навоий (6,6 миллион сўм) вилоятида қайд этилди.
Ярим йил давомида мамлакатда ўртача ойлик иш ҳақининг энг баланд кўрсаткичи — банк, суғурта, лизинг, кредит ва воситачилик фаолияти соҳасига тўғри келиб, 14,4 миллион сўмни ташкил этди. Ахборот ва алоқа соҳаси вакилларига ўртача 12,4 миллион сўм, ташиш ва сақлашга 7,7 миллион сўм, саноат соҳасида 6,2 миллион сўм тўланган.
Изоҳ (0)