Сурия президенти Аҳмад аш-Шараъага нисбатан сўнгги етти ой ичида уюштирилган учта суиқасднинг олди олинди. Ҳужумлардан камида биттаси Туркия хавфсизлик кучларининг бевосита аралашуви туфайли бартараф этилган. Бу ҳақда Yedioth Ahronoth нашрининг махсус репортажида маълум қилинди.
Маълумотларга кўра, Шараъага қарши биринчи суиқасд март ойида пойтахт Дамашқдаги Қаср аш-Шааб саройидан чиқиш пайтида содир этилган. Шубҳали ҳаракатларни сезган Туркия хавфсизлик кучлари дарҳол аралашиб, ҳужумчини зарарсизлантирган. Жиноятчи ҳибсга олиниб, сўроқ қилинган. Воқеа президентнинг илтимосига биноан сир тутилган.
Иккинчи ҳужум уриниши Иордания чегарасидаги Дараъа вилоятида юз берган. Сурия ва Туркия хавфсизлик кучлари Аш-Шараъа карвонининг ушбу ҳудудга ташрифи пайтида йўлда икки шубҳали шахсни қўлга олган. Чалғитувчи ҳаракат туфайли ҳужумнинг олди олинган. Ушбу ҳодиса ҳам жамоатчиликка эълон қилинмай ёпилган.
Учинчи ва энг жиддий суиқасд режаси Дамашқдаги муайян йўналишда қуролли пистирма қўйишни ўз ичига олган. Сўнгги дақиқада Туркия ва маҳаллий разведка томонидан аниқланган ҳужум амалга оширилишидан олдин тўхтатилган. Бу воқеадан кўп ўтмай Аш-Шараъанинг Дамашқдан тўсатдан чиқиб кетиши эътиборни тортган.
Бундан аввал Исроил миллий хавфсизлик вазири Итамар Бен-Гвир Сурия президенти Аҳмад аш-Шараъни ўлдиришга чақирганди.
Изоҳ (0)