“Андижон биокимё заводи”нинг давлат улушини чорва молларига озуқа ишлаб чиқарувчи МЧЖ 101,3 млрд сўмга сотиб олди

“Андижон биокимё заводи”  устав капиталидаги 96 фоиз давлат акциялари 101,3 миллиард сўмга Жасмин Голд Group МЧЖга сотилди. Бу ҳақда Давлат активларини бошқариш агентлиги хабар берди.

Қайд этилишича, рақобат муҳити таъминланган савдо жараёни натижасида, инвесторлар томонидан келиб тушган аризалар Европа Иттифоқи ва АҚШнинг, шунингдек йирик халқаро молия институтларининг санкциялари рўйхатига киритилмагани юзасидан ўрганилиб, мазкур шартларга мувофиқ келадиган талабгорлар хусусийлаштириш жараёнининг кейинги – Мажбуриятга эга бўлган таклифлар (БО)ни тақдим этиш босқичига ўтказилган.

Ўз навбатида, консултант томонидан “Андижон биокимё заводи” устав капиталидаги давлат акция пакетларини яхлит пакет (96 фоиз) сифатида сотиш бўйича таклифлар қабул қилинган.

Натижада, сотиб олиш учун қўйилган талабларга тўлиқ жавоб берган, келажакда Корхона фаолиятини барқарор ривожланишини таъминлай оладиган ва ишлаб чиқариш жараёнларини тўлиқ давомийлигини шакллантиришга салоҳиятли бўлган Жасмин Голд Group МЧЖ энг юқори нарх таклифи билан савдо ғолиби деб топилган.

Таъкидланишича, харидорнинг таклифи консултант томонидан ҳисобланган корхонанинг индикатив нархлар оралиғининг юқори қисмида жойлашган ҳамда корхонанинг баҳоланган қийматидан юқори. Корхонани хусусийлаштириш натижалари Давлат активларини хусусийлаштириш ва хусусийлаштириш жараёнларини мувофиқлаштириш давлат комиссиясининг тегишли қарори билан маъқулланган.

Маълумот учун,  2023 йилда “Андижон биокимё заводи” томонидан 1 млн дал спирт ишлаб чиқарилган бўлиб, соф фойдаси 10,1 миллиард сўмни, соф активлари 71,5 миллиард сўмни ва жами мажбуриятлари 17,3 миллиард сўмни ташкил қилган.

Жасмин Голд Group ҳақида

“Узорг.инфо” маълумотларига кўра, Жасмин Голд Group МЧЖ 2016 йилда рўйхатга олинган бўлиб, унинг 100 фоиз улушига Саъдулла Юсупов эгалик қилади.

Ташкилот манзили сифатида Қорақалпоғистон Респулбикаси Мўйноқ тумани, МЧЖ фаолияти эса “чорва молларига тайёр озуқалар ишлаб чиқариш” сифатида кўрсатилган.

Компаниянинг устав фонди — 448,3 миллион сўмни ташкил этади.

• Эслатиб ўтамиз, июнь ўрталарида Давлат активларини бошқариш агентлиги “Миллий банклараро процессинг маркази” (Ҳумо тўлов тизими) устав капиталидаги давлат улушининг 100 фоизини оммавий савдолар орқали хусусийлаштиришни ташкил этиш бўйича профессионал консалтинг компаниясини танлаш бўйича танлов эълон қилганди.