Perfectum уяли алоқа оператори тўлиқ хусусийлаштирилди. Бунга таҳлилчи Тимурмалик Элмурадов эътибор қаратди.
Корхона ва ташкилотларнинг ягона давлат реестри маълумотларига кўра, Rubicon Wireless Communication МЧЖ ҳозирда 100 фоиз тадбиркор Абдумалик Валижанович Иминовга тегишли. Компания раҳбари — Дмитрй Шуков.
Perfectum’даги давлат улуши хусусийлаштирилиши ҳақида 2020 йилда маълум қилинганди. Бу ҳақда президентнинг “Давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштиришга оид чора-тадбирлар тўғрисида”ги фармонида белгиланганди.
Ўша пайт компаниянинг 65 фоиз улуши давлатга, қолган қисми эса Amis Protrade International’га тегишли эди.
2023 йил 12 декабрдан компания номи Rubicon Wireless Communication МЧЖга ўзгартирилган. 2023 йил якуни бўйича ушбу компания айланмаси 85,5 миллиард сўмни ташкил этган, 22,4 миллиард сўм солиқ тўлаган.
Perfectum акцияларини сотиш ҳақидаги хабарлар очиқ манбаларда келтирилмаган.
Изоҳ (0)