Бундан 16 йил аввал, 2009 йил 25 июнь куни машҳур қўшиқчи Майкл Жексон вафот этганди. Доим омма эътиборида бўлган қўшиқчининг ҳаёти осон кечмаган. Тинимсиз концертлар туфайли оғир чарчоқлар ва танасидаги дардлар охири уни йиқитади. Асли қора танли бўлган дунё юлдузининг тана рангини қандай ўзгартиргани ҳақидаги баҳслар ҳали узоқ йиллар давом этса ажаб эмас.
Майкл Жексон 1958 йил 29 августда АҚШнинг Индиана штати Гери шаҳрида кўп болали қора танлилар оиласида туғилган.
Майклнинг 5 нафар ака-укаси, 3 нафар опа-сингиллари бўлган. У оилада еттинчи фарзанд эди. Отаси заводда оддий ишчи бўлган ва бўш вақтларида ўзи тузган ҳаваскор гуруҳ билан концертлар қўйиб турган.
Кейинчалик болаларида мусиқий истеъдодни кўриб ота The Jackson 5 номи билан мусиқий гуруҳ ташкил этади. Майкл бу гуруҳга қўшилганида 5 ёшда эди.
Жексонлар аввалига маҳаллий клубларда, тилга тушгач турли шоуларда қўшиқ куйлашади. Тез орада улар мамлакатдаги таниқли гуруҳга айланади.
1972 йилда ҳали 14 ёшга тўлмаган Майкл ўзининг биринчи тўпламини чиқаради. Йил охиригача иккинчи альбом тақдимоти ҳам ўтказилади.
Хонанда ундан ўрин олган “Ben” деб номланган қўшиқни шу номдаги фильмда саундтрек сифатида куйлайди. Қўшиқ 1973 йилда “Фильм учун энг яхши саундтрек” деб топилади ва ҳали 14 ёшга ҳам тўлмаган болакай Оскар мукофоти билан тақдирланади.
Шундан сўнг у бирин-кетин янги альбомларни тақдим этиб бораверади ва дунё миқёсидаги таниқли қўшиқчига айланади.
Оиласи, болалари ва дўстлари
Майкл Жексон 1994 йилда машҳур қўшиқчи Элвис Преслининг қизи Лиза Мари Преслига уйланади.
Уларнинг никоҳ тўйи Доминикан Республикасида яширин тарзда бўлиб ўтади ва орадан икки ойдан сўнг бу никоҳ оммага ошкор қилинади.
Аммо бу никоҳ кўпга чўзилмайди: 1996 йилда улар ажрашишади. Кўп ўтмай қўшиқчи Дебби Роуга уйланади. Бу аёл аввал ҳамшира бўлиб ишлаган ва оммага унча таниш эмасди.
Майкл ва Дебби икки нафар фарзанд кўришади. 1997 йилда ўғли Принс Майкл Жексон, 1998 йилда қизи Перис Майкл Кетрин Жексон туғилади. 1999 йилда бу жуфтлик ҳам ажрашади.
2002 йилда Майклнинг учинчи фарзанди Кичик Принс Майкл Жексон туғилади. Бу бола суррогат йўли билан туғилган ва қўшиқчи унинг онасини ошкор қилмаган.
Майкл Жексон ҳар доим фарзандларини ОАВ ва омма эътиборидан узоқда ушлаган. Омма олдига улар асосан ниқоб таққан ҳолда чиқишган. Қўшиқчининг ўлимидан сўнг болаларни Майклнинг онаси Кетрин Жексон ўз қарамоғига олади.
Майкл дунёга таниқли шахс сифатида бошқа машҳур шахслар, жумладан, қўшиқчилар Уитни Хюстон, Даяна Росс, Лаёнел Ричи, Стиви Уандер, актрисалар Брук Шилдс, Элизабет Тейлор, актёрлар Марлон Брандо, Эдди Mёрфи, Марк Лестер, Крис Такер, Маколей Калкин билан дўст бўлган.
Шунингдек, у малика Диана билан дўстона алоқаларда бўлган. Queen гуруҳи ва қўшиқчи Фредди Меркюрининг концертларига бориб турган.
Тери рангининг ўзгартирилиши
Майкл Жексон 1980 йиллар бошларида пластик операция қилдириб, терисининг рангини оқартиради. Ҳабашларга хос бўлган қалин лабларини ингичкалаштиради, бурни шаклини ҳам ўзгартиради. Бу амалиёт қўшиқчини умрининг охиригача пластик жарроҳларга қарам қилиб қўяди.
Чунки тери ранги ўзгартирилгандан сўнг кўп маротаба тананинг турли қисмларида яна қора ранг пайдо бўлиши кузатилаверади. Бундан ташқари унда тери касалликлари ҳам пайдо бўла бошлайди. Шу сабабли Майкл мунтазам тери рангини бир хилда ушлаб турадиган ёки кўрсатадиган кучли пардоз воситаларидан фойдаланиб юрган.
Кейинчалик қўшиқчи тери рангини атайлаб оқ рангга ўзгартирганини инкор қилган. У ўзининг афроамерикалик эканини ва бу билан фахрланишини, касалликлар туфайли терисига уни оқартирувчи кремлар суртиб юрганини айтган.
Бироқ уни яқиндан таниганлар бошида у айнан териси рангини оққа ўзгартиришни хоҳлаб пластик жарроҳликка мурожаат қилганини айтишади.
Ҳаётининг сўнгги йиллари
Майкл Жексон ҳаётининг сўнгги йиллари бирмунча оғир кечди. Соғлигидаги муаммолар уни анча қийнаб қўйди. Шунда ҳам қўшиқчи концерт беришни тўхтатмади.
2009 йилда ўзининг охирги марта концерт турини эълон қилади. Концерт ўша йили июлда бошланиши ва 40 кун давом этиши режалаштирилганди. Бироқ уни ўтказишга улгурмайди.
У сўнгги концертини аввалроқ эълон қилинган режа бўйича 2009 йил 23 июнь куни ўтказади ва орадан икки кун ўтгач, 25 июнда вафот этади.
Расмий маълумотларга кўра, Майклнинг ўлимига дориларни ҳаддан зиёд кўп истеъмол қилгани сабаб бўлган.
25 июнь куни шифокор Конрад Мюррей қўшиқчи танасига пропофол юборади ва уни ёлғиз қолдиради. Орадан икки соат ўтгач Майклнинг ёнига қайтган шифокор унинг оғир ҳолатда ётгани устидан чиқади.
Шифокор дарҳол қўшиқчига ёрдам беришга уринади, бироқ фойдаси бўлмайди. Маҳаллий вақт билан соат 12:21 да 911 қутқарув хизматига қўнғироқ қилишади. Шифокорлар 3 дақиқада етиб келади.
Йўлда унинг тўхтаб қолган юрагини ишлатишга уринишади. Жараён шифохонада ҳам давом этади. Бироқ қўшиқчининг ҳаётини сақлаб қолишнинг иложи бўлмайди. Соат 14:26 да Майкл Жексоннинг ўлими қайд этилади.
Ҳаётлик чоғида жуда кўп рекордлар ўрнатган ва ҳар доим омма эътиборида бўлган қўшиқчининг ўлими интернетни “қотириб қўяди”.
Унинг вафоти ҳақидаги хабар дунё бўйлаб тарқалар экан, Google, Facebook, Yahoo!, Twitter ва Википедияга бир вақтнинг ўзида бир неча ўн миллионлаб инсонлар киради ва уларнинг иш фаолиятида узилишлар, тўхтаб қолишлар кузатилади.
Майкл Жексоннинг дафн этилиши анча пайт ортга сурилиб келади ва уни 3 сентябрь куни тупроққа қўйишади. Қўшиқчининг ўлими бўйича очилган жиноят ишида шифокор Конрад Мюррей айбдор деб топилиб, у 4 йилга қамалади.
Рекордлари
Майкл Жексон ўз фаолияти давомида 80 дан ортиқ дунё рекордини ўрнатган. Улардан энг аҳамиятлилари қуйидагилар:
Барча даврларнинг энг оммабоп қўшиқчиси. Майкл Жексоннинг концертларига жами 17 миллион одам кирган ва бу мутлақ рекорд ҳисобланади.
1988 йилда Лондондаги Wembley стадионида ўтказилган 7 та концертига 504 минг одам келган ва бу концертларда энг кўп одам тўплаш бўйича мутлақ рекорддир.
Концертлар қўшиқчига яхши даромад келтирган. У 1989 йилда 100 млн доллар ишлаб топган биринчи қўшиқчига айланади.
2009 йилда унинг Тҳис Ис Ит деб номланган концертига бир дақиқада 1,5 минг дона чипта сотилган ва бу ҳам рекорд ҳисобланади.
Барча даврларнинг энг муваффақиятли мусиқачиси. Майкл Жексон бренди остида қарийб 400 млн дона диск сотилган. Бу унинг дискларини тайёрловчи мусиқа индустриясига 5 млрд доллар даромад келтирган.
1991 йилда у Sony/Epis/Warner билан шоу-бизнес тарихида энг йирик — 890 млн долларлик шартнома имзолайди.
Барча даврларнинг энг кўп мукофот соҳиби бўлган қўшиқчи. Майкл Жексон фаолияти давомида 372 та турли расмий мукофотларни қўлга киритган.
Энг оммабоп альбом. 1982 йилда чиқарилган Thriller альбоми 110 млн нусхада сотилган ва бу ҳам мутлақ рекорд ҳисобланади.
Дунёдаги энг машҳур инсонлардан бири. Майкл Жексон дунёдаги энг таниқли инсонлардан бири бўлган. Уни дунёнинг барча жойларида, ҳатто Амазонка ўрмонларида ярим ёввойи ҳолда яшаётган қабилаларгача билишган. Ҳатто Микки Маус ва қорбобонинг кимлигини билмайдиганлар ҳам Майкл Жексонни таниган.
Энг саховатли мусиқачи. Майкл Жексон кўп марта жуда катта миқдорда хайр-эҳсон қилиб турган. 1985 йилда куйланган Wе Are The World қўшиғи сотувидан келган 67 млн долларни у Африкадаги очарчиликдан қийналаётганларга ёрдам берувчи ташкилот ҳисобига ўтказган.
2000 йилда Майкл Жексон дунёдаги 39 та хайрия компаниясини қўлловчи шахс сифатида Гиннеснинг рекордлар китобига киритилган.
Вафотидан сўнг энг кўп даромад келтираётган шахс. Майкл Жексон вафотидан сўнг ҳам жуда катта даромад келтираётган шахс ҳисобланади. 2010 йилда у вафотидан сўнг энг кўп даромад келтираётган шахслар рўйхатида биринчи ўринда бўлган.
Майкл Жексоннинг қўшиқларини хонанданинг ўлимидан сўнг унинг меросхўрларидан Sony Music 750 млн долларга харид қилган. Ҳозирда Майкл Жексоннинг қўшиқларига ва улар келтираётган фойдага шу компания эгалик қилади.
2000 йилда Майкл Жексон Гиннеснинг рекордлар китобида энг кўп эсланган шахс сифатида Гиннеснинг рекордлар китобига кирган.
Яна бир қизиқ маълумот — Майкл Жексоннинг концертларида ўнлаб тез тиббий ёрдам машиналари навбатчиликда турган. Бунга сабаб кучли ҳаяжон туфайли унинг айрим мухлислари ҳушини йўқотарди ва бундай пайтларда тиббиёт ходимларининг ёрдами лозим бўларди.
Майкл Жексоннинг тўнғич ўғли Принс Майкл Жексон ва қизи Перис Жексон актёрлик билан шуғулланиб келишмоқда. Кичик Принс Майкл Жексон продюсер ва режиссёрлик қилмоқда.
Ғайрат Йўлдош тайёрлади.
Изоҳ (0)