Рақобатни ривожлантириш ва истеъмолчилар ҳуқуқларини ҳимоя қилиш қўмитаси 16 июль куни Anglesey Food МЧЖ (Korzinka номли супермаркетлар тармоғи)га нисбатан иш қўзғатган эди.
17 июль куни берилган хабарга кўра, қўмитанинг истеъмолчиларнинг ҳуқуқларини ҳимоя қилиш ва реклама тўғрисидаги қонунчилик ҳужжатлари бузилиши юзасидан ишларни кўриб чиқиш бўйича Махсус комиссияси томонидан қўзғатилган ишда Korzinka супермаркетлар тармоғи бренди остида фаолият кўрсатувчи Anglesey Food МЧЖ ХК айбдор деб топилган.
Маълум қилинишича, Korzinkaъга нисбатан белгиланган тартибда молиявий жарима қўллаш юзасидан судга киритиш бўйича қарор қабул қилинган. Шунингдек, унга ушбу реклама бўйича қонун бузилишига йўл қўйилган ҳолатларни бир ойлик муддатда бартараф этиш юзасидан бажарилиши мажбурий бўлган кўрсатма берилган.
“Маълумот ўрнида, ваколатли органнинг ушбу қароридан норози бўлган томон судга мурожаат қилиш ҳуқуқига эга”, дейилади хабарда.
Korzinka супермаркетлар тармоғи матбуот хизмати ҳолат юзасидан баёнот берди.
Қайд этилишича, махсус комиссия қарори ва қўмита хабарида кўрсатилган қонунбузарликларни бартараф этиш бўйича кўрсатмалар компанияга тақдим этилмаган.
“17 июлда қўмитада мазкур иш бўйича тингловнинг иккинчи босқичи бўлиб ўтди, унда биз қўшимча маълумотларни тақдим этдик ва барча саволларга жавоб бериб, ишни ўрганишга кўмаклашдик. Йиғилиш якунлари бўйича Махсус комиссия қарори 5 иш куни ичида тақдим этилиши маълум қилинди.
Бироқ айни вақтда, Махсус комиссия қарори ва Қўмита хабарида кўрсатилган қонунбузарликларни бартараф этиш бўйича кўрсатмалар компанияга тақдим этилмаган”, дейилади хабарда.
Қўшимча қилинишича, қўмитанинг ушбу қарор ва кўрсатмаларни Korzinka’га тақдим этгани ҳақидаги маълумот ҳақиқатга тўғри келмайди.
“Биз, аввалгидек, қонунчиликка зид ҳаракат амалга оширмаганимиз, деб ҳисоблаймиз. Айниқса, қарор матни ва кўрсатмалар билан танишиш имконимиз йўқ бўлган ҳозирги ҳолатда, Қўмитанинг ушбу баёнотини ҳам асоссиз деб ҳисоблаймиз.
Эслатиб ўтамиз, агар Махсус комиссия қарори ёзма шаклда тақдим этилса ва биз у билан рози бўлмасак, компания ушбу қарор устидан 30 кун ичида судга шикоят қилиш ҳуқуқига эга”, дейилади Korzinka баёнотида.
Изоҳ (0)