Raqobatni rivojlantirish va isteʼmolchilar huquqlarini himoya qilish qo‘mitasi 16-iyul kuni Anglesey Food MCHJ (Korzinka nomli supermarketlar tarmog‘i)ga nisbatan ish qo‘zg‘atgan edi.
17-iyul kuni berilgan xabarga ko‘ra, qo‘mitaning isteʼmolchilarning huquqlarini himoya qilish va reklama to‘g‘risidagi qonunchilik hujjatlari buzilishi yuzasidan ishlarni ko‘rib chiqish bo‘yicha Maxsus komissiyasi tomonidan qo‘zg‘atilgan ishda Korzinka supermarketlar tarmog‘i brendi ostida faoliyat ko‘rsatuvchi Anglesey Food MCHJ XK aybdor deb topilgan.
Maʼlum qilinishicha, Korzinkaʼga nisbatan belgilangan tartibda moliyaviy jarima qo‘llash yuzasidan sudga kiritish bo‘yicha qaror qabul qilingan. Shuningdek, unga ushbu reklama bo‘yicha qonun buzilishiga yo‘l qo‘yilgan holatlarni bir oylik muddatda bartaraf etish yuzasidan bajarilishi majburiy bo‘lgan ko‘rsatma berilgan.
“Maʼlumot o‘rnida, vakolatli organning ushbu qaroridan norozi bo‘lgan tomon sudga murojaat qilish huquqiga ega”, deyiladi xabarda.
Korzinka supermarketlar tarmog‘i matbuot xizmati holat yuzasidan bayonot berdi.
Qayd etilishicha, maxsus komissiya qarori va qo‘mita xabarida ko‘rsatilgan qonunbuzarliklarni bartaraf etish bo‘yicha ko‘rsatmalar kompaniyaga taqdim etilmagan.
“17-iyulda qo‘mitada mazkur ish bo‘yicha tinglovning ikkinchi bosqichi bo‘lib o‘tdi, unda biz qo‘shimcha maʼlumotlarni taqdim etdik va barcha savollarga javob berib, ishni o‘rganishga ko‘maklashdik. Yig‘ilish yakunlari bo‘yicha Maxsus komissiya qarori 5 ish kuni ichida taqdim etilishi maʼlum qilindi.
Biroq ayni vaqtda, Maxsus komissiya qarori va Qo‘mita xabarida ko‘rsatilgan qonunbuzarliklarni bartaraf etish bo‘yicha ko‘rsatmalar kompaniyaga taqdim etilmagan”, deyiladi xabarda.
Qo‘shimcha qilinishicha, qo‘mitaning ushbu qaror va ko‘rsatmalarni Korzinkaʼga taqdim etgani haqidagi maʼlumot haqiqatga to‘g‘ri kelmaydi.
“Biz, avvalgidek, qonunchilikka zid harakat amalga oshirmaganimiz, deb hisoblaymiz. Ayniqsa, qaror matni va ko‘rsatmalar bilan tanishish imkonimiz yo‘q bo‘lgan hozirgi holatda, Qo‘mitaning ushbu bayonotini ham asossiz deb hisoblaymiz.
Eslatib o‘tamiz, agar Maxsus komissiya qarori yozma shaklda taqdim etilsa va biz u bilan rozi bo‘lmasak, kompaniya ushbu qaror ustidan 30 kun ichida sudga shikoyat qilish huquqiga ega”, deyiladi Korzinka bayonotida.
Izoh (0)