Ўзбекистонда 1,2 миллион ўқувчи учун мактаб ўринлари етишмайди. Бу ҳақда Мактабгача ва мактаб таълими вазирлиги бошқарма бошлиғи Эркин Муродов “Дарё”га берган интервьюсида маълум қилди.
Эркин Муродовнинг айтишича, мактабларда беш миллионтадан ортиқ ўқувчи ўрни мавжуд, лекин 6,4 миллион бола таълим олмоқда.
“Бугунги кунда давлат мактабларида 6,4 миллион нафар бола таълим олади. Шундан 60 фоиздан ортиғи икки сменада ўқийди. Айни пайтда мактабларда беш миллионтадан ортиқ ўқувчи ўрни мавжуд. Ўртадаги фарқ қарийб 1,2 миллионта атрофида. Бу фарқни қисқартириш учун инвестиция дастурлари асосида мактаблар қуриш, қўшимча ўқувчи ўринлари яратиш ишлари амалга оширилмоқда. Масалан, 2023 йилда 582 та мактабда қурилиш-таъминлаш ишлари бажарилиб, 172 мингта ўқувчи ўрни яратилган. Жорий йилда ҳам 520 дан ортиқ мактабда қурилиш-таъмирлаш ишлари амалга оширилиб, 182 мингта қўшимча ўқувчи ўрни яратиш мақсад қилинган”, деди вазирлик вакили.
Эркин Муродов суҳбат давомида мактаблардаги синфларда ўқувчиларни ўртача тўлдириш меъёри 25 нафарни ташкил этишини айтди. Давлат стандартига кўра, битта синфда ўқувчилар сонини 35 нафардан оширмаслик белгиланган.
“Республикадаги давлат мактабларида жами 245 мингта синфлар мавжуд. Шундан атиги икки мингтасида ўқувчилар сони 35 нафардан ошади. Бу ҳолат Тошкент шаҳри ва вилоятлар марказлари, янги қурилаётган массивларда, яъни аҳоли сони кўп ҳудудлардаги мактабларда учрайди. Синфда 35 нафар ўқувчи ўқиши барча фанларга тааллуқли эмас. Бизда 10 дан ортиқ фанлар икки гуруҳга бўлиб ўқитилади”, деди вакилик расмийси.
Маълумот учун, айни пайтда республикада 10 182 та давлат, 400 тадан ортиқ нодавлат мактаблар фаолият юритмоқда. Янги ўқув йили учун қарийб 719 000 нафардан ортиқ болани 1-синфга қабул қилиш режалаштирилган. Жорий йил 15 июль ҳолатига 521 000 нафардан ортиқ болалар бошланғич синфга олинди. Хусусий мактабларга эса 25 кун ичида 4 000 нафардан кўп ўқувчи қабул қилинган.
Изоҳ (0)