Тошкент вилояти Зангиота туманида 2023 йилнинг декабрь ойида 13 ёшли қиз ўгай онаси томонидан мунтазам зўравонликка учраб келаётгани аниқлангани ҳақида хабар берилганди. Болалар омбудсмани матбуот хизмати ҳолат бўйича қўшимча маълумот берди.
Таъкидланишича, ҳолат юзасидан қўзғатилган жиноят иши бўйича олиб борилган дастлабки терговда аниқланишича, Ш.С. 2010 йилда туғилган қизи С.Р.ни 2023 йил давомида муттасил равишда дўппослаб, унга нисбатан жисмоний ҳамда руҳий жиҳатдан азоб бериб, унда кучли қўрқув ҳосил қилиш йўли орқали ўлдириш ёки зўрлик ишлатиш билан қўрқитиб, танасининг турли қисмларига тан жароҳатлари етказиб келган.
Болалар омбудсмани вакили бола манфаатлари нуқтайи назаридан мазкур ишнинг суд процессида кўрилишида иштирок этди.
5 июнь куни Тошкент вилояти жиноят ишлари бўйича Зангиота туман судида мазкур жиноят иши юзасидан чиқарилган ҳукмга биноан, Ш.С. Жиноят кодексининг 110-моддаси 2-қисми “а, в” бандлари (қийнаш) ва 112-моддаси 3-қисми (ўлдириш ёки зўрлик ишлатиш билан қўрқитиш) билан айбдор деб топилиб, унга 3 йил 6 ой муддатга озодликдан чеклаш жазоси тайинланди ва мазкур жазо билан боғлиқ тегишли чекловлар ўрнатилди.
Изоҳ (0)