Toshkent viloyati Zangiota tumanida 2023-yilning dekabr oyida 13 yoshli qiz o‘gay onasi tomonidan muntazam zo‘ravonlikka uchrab kelayotgani aniqlangani haqida xabar berilgandi. Bolalar ombudsmani matbuot xizmati holat bo‘yicha qo‘shimcha maʼlumot berdi.
Taʼkidlanishicha, holat yuzasidan qo‘zg‘atilgan jinoyat ishi bo‘yicha olib borilgan dastlabki tergovda aniqlanishicha, SH.S. 2010-yilda tug‘ilgan qizi S.R.ni 2023-yil davomida muttasil ravishda do‘pposlab, unga nisbatan jismoniy hamda ruhiy jihatdan azob berib, unda kuchli qo‘rquv hosil qilish yo‘li orqali o‘ldirish yoki zo‘rlik ishlatish bilan qo‘rqitib, tanasining turli qismlariga tan jarohatlari yetkazib kelgan.
Bolalar ombudsmani vakili bola manfaatlari nuqtayi nazaridan mazkur ishning sud protsessida ko‘rilishida ishtirok etdi.
5-iyun kuni Toshkent viloyati jinoyat ishlari bo‘yicha Zangiota tuman sudida mazkur jinoyat ishi yuzasidan chiqarilgan hukmga binoan, SH.S. Jinoyat kodeksining 110-moddasi 2-qismi “a, v” bandlari (qiynash) va 112-moddasi 3-qismi (o‘ldirish yoki zo‘rlik ishlatish bilan qo‘rqitish) bilan aybdor deb topilib, unga 3 yil 6 oy muddatga ozodlikdan cheklash jazosi tayinlandi va mazkur jazo bilan bog‘liq tegishli cheklovlar o‘rnatildi.
Izoh (0)