Жорий йил январь—июль ойларида Cobalt автомобили ишлаб чиқариш ҳажми ўтган йил мос давридагидан 1,9 фоизга камайди. Бу ҳақда Статистика қўмитаси шарҳида маълум қилинган.
Етти ой давомида мамлакатда 212 минг 156 дона енгил автомобиль ишлаб чиқарилган. Бунда асосий улуш UzAuto Motors компанияси ҳиссасига тўғри келган.
Мазкур муддатда энг кўп ишлаб чиқарилган автомобиль Cobalt бўлган — 83 минг 167 дона. Бироқ ушбу моделдаги машиналар сони 2024 йил январь—июлидагидан (84 минг 758 та) камайган.
Ўз навбатида Damas ишлаб чиқариш 5,5 фоизга ортиб, 51 минг 587 донага етган. Tracker ўтган йил мос давридагидан 12,9 фоизга кўпроқ ишлаб чиқарилган — 26 минг 385 дона.
Ўтган етти ой давомида 18 минг 734 дона Onix, 14 минг 419 дона KIA, 4 минг 838 дона Chery, 4 минг 425 дона Haval, 8 минг 601 дона BYD ишлаб чиқарилган. Маълум қилинишича, ўтган йил январь—июль ойларида BYD автомобиллари Ўзбекистонда ишлаб чиқарилмаган.
Гарчи Cobalt ишлаб чиқариш улуши юқори бўлса-да автомобилни исталган пайт расмий дилерлардан сотиб олиш имконсизлигича қолмоқда. UzAuto Motors 2025 йил 7 январда мазкур автомобиль учун охирги марта шартномалар очилганини эълон қилганди. Онлайн савдо жараёни бор-йўғи 6 соат давом этган. Ўшанда компания жами 50 минг 17 та шартнома тузилганини билдирган.
Изоҳ (0)