Ички ишлар вазирлиги матбуот котиби Шоҳрух Ғиёсов Бош прокуратура Қарши шаҳрида ИИБ мансабдорининг ҳомиладор аёлга нисбатан қилган хатти-ҳаракатини ўрганаётганини маълум қилди. ИИВ ахборот хизмати раҳбарига кўра, ҳолат тасдиқланмаган.
Бу ҳақда бугун, 19 август куни вазирликда бўлиб ўтган матбуот анжуманида сўз борди.
Буни ҳозир фақат прокуратура ўрганяпти. Бошланғич маълумотга кўра, бу ҳолат тасдиқланмаган. Лекин прокуратура ўрганишни тугатиб, тўлиқ маълумот бермагунча, биз уни тўхтатиб турибмиз. Чунки бу ҳолат ҳақиқатдан тасдиқланмаган. Агарда биз ҳозир бирданига уни тасдиқланмади, деб берадиган бўлсак, яна савол туғилиши мумкин, деди Шоҳрух Ғиёсов Бош прокуратура қандай хулоса қилишини айтар экан.
Вазирлик масъули, шунингдек, саволга жавоб бериш жараёнида таҳририятга маълумот келиб тушгач, иддаога вазирлик ахборот хизматидан изоҳ олинмаганини таъкидлади.
Сизларга маълумот келиб тушганидан кейин сизлар биринчи навбатда биздан маълумот сўрардинглар, одатда. Лекин ўша пайтда Қарши шаҳар деб маълумот чиқардинглар, дея таҳририят иккинчи томондан изоҳ олмаганига урғу берди.
Масъулнинг бу гапига жавоб берган таҳририят журналисти мақолани тайёрлаш давомида вилоят ИИБ ахборот хизматидан изоҳ олганини билдирди.
Эслатиб ўтамиз, мазкур мақолада вилоят ИИБ ахборот хизмати Ирода Расулованинг ҳолатга “Мурожаатчи ёлғон маълумот берган. Ҳозир Фаррух Ибрагимов билан гаплашдим. У ўша аёл билан юзма-юз келмаганини айтди. Қолган икки нафар ходимга чора қўлланилгани ҳақидаги маълумот ҳам ёлғон”, дея берган изоҳи қўшилганди.
Ирода Расулова журналистнинг “Фаррух Ибрагимов 2025 йилнинг 13 июнь куни бошқармага олиб борилган Марҳабо Боймуродова билан кўришмаганми?” дея берган саволига “бунинг аниғини билмайман”, деб жавоб қайтарганди. Шунингдек, у журналистнинг Фаррух Ибрагимов билан мулоқот қилиш ҳақидаги сўровини рад қилганди.
Бош прокуратура ахборот хизмати Ҳаёт Шамсутдинов Қаршидаги ҳолат бўйича таҳририятга маълумот берар экан, “Қашқадарё вилоят суди жиноят ишлари бўйича судлов ҳайъати апелляция инстанциясининг 2025 йил 10 июлдаги қарори Қарши шаҳар прокуратураси томонидан ижро учун қабул қилинган. Текшириш натижалари ҳақида қўшимча хабар қилинади”, деганди.
Изоҳ (0)