Тошкентдан Россияга кетаётган фуқарода эҳтимолий тарихий қимматга эга бўлган танга, узук ва билакузуклар топилди. Бу ҳақда пойтахт Божхона бошқармаси хабар берди.
Келтирилишича, “Келес” темирйўл чегара божхона пости ходимлари томонидан ўтказилган божхона назорати давомида Тошкент—Новосибирск йўналишида ҳаракатланаётган поезд вагонларидан бирида, Ўзбекистон ҳудудидан ноқонуний равишда олиб чиқилаётган эҳтимолий тарихий қимматга эга бўлган буюмлар фош этилди.
Вагон кузатувчисига тегишли бўлган қора рангли сумка ичида, божхона назоратидан яширилган ҳамда оғзаки сўров давомида божхона ходимларига маълум қилинмаган турли буюмлар борлиги аниқланди.
Жумладан, 1 дона қоғоз қутига жойлаштирилган целлофан пакетчалар ичида ҳар хил турдаги ва катталикдаги 174 дона танга, 27 дона турли узук, 2 дона камон ўқлари учлари (наконечник), 2 дона билакузук, 86 дона заргарлик буюмлари ҳамда 26 дона маиший буюм элементлари борлиги маълум бўлди.
Дастлабки тахминларга кўра, аниқланган ушбу буюмлар тарихий ва маданий аҳамиятга эга бўлиши мумкин. Шу боис, ҳолат юзасидан ҳужжатлар белгиланган тартибда расмийлаштирилиб, буюмлар бадиий экспертизага топширилди. Экспертиза хулосасига асосан тегишли қонуний баҳо берилади.
2024 йилда ҳамда жорий йилнинг ўтган 6 ойи давомида божхона органлари томонидан 299 та ҳуқуқбузарликлар аниқланиб, ушбу ҳолатлар бўйича 5 981 та маданий бойликларнинг ноқонуний олиб ўтилишининг олди олинди.
Жумладан, 3 055 та қадимий тангалар, 706 та муомалада бўлмаган пул банкнотлари, 1 212 та орден ва медаллар, 118 та санъат асарлари, 46 та ҳайкалтарошлик асарлари, 29 та қадимий китоб ва қўлёзмалар, 3 та археологик ашёлар, 14 та қадимий мусиқа асбоблари, 424 та ҳунармандчилик буюмлари, 358 та қадимий заргарлик буюмлари, 14 та фотоматериаллар, 1 та архитектура ёдгорлиги қисми ҳамда 1 та қадимий қурол-аслаҳа аниқланган.
Изоҳ (0)