Тошкент шаҳрининг бир қатор туманларида тўлиқ ҳужжатлар тўпламига эга бўлмаган 59 та объектда қурилиш ишлари бутунлай тўхтатилди, объектлар электр таъминотидан узиб қўйилди.
Пойтахт ҳокимлиги матбуот хизматига кўра, улар сони:
- Олмазор туманида — 5 та;
- Чилонзор туманида — 5 та;
- Миробод туманида — 8 та;
- Мирзо Улуғбек туманида — 7 та;
- Сергели туманида — 3 та;
- Учтепа туманида — 2 та;
- Яккасарой туманида — 2 та;
- Янгиҳаёт туманида — 17 та;
- Яшнобод туманида — 3 та.
Қайд этилишича, сўнгги ойларда Тошкентда айрим қурувчилар томонидан қурилиш меъёрлари ва қонунчилик талаблари бузилиши ҳолатлари кўплаб аниқланди. Баъзилари зарур рухсат берувчи ҳужжатлар, экспертиза хулосалари ва техник маълумотномаларни олмасдан қурилишни бошлаб, фуқароларга ноқонуний равишда уй-жой сотишга уринган.
“Бундай хатти-ҳаракатлар натижасида айрим юртдошларимиз виждонсиз компанияларга ишониб, жамғармаларини йўқотиб, уй-жойсиз қолмоқда. Тошкент шаҳар ҳокимлиги ваколатли тузилмалар билан ҳамкорликда бу масалада қатъий ва принципиал позицияни эгаллаган”, дейилади ҳокимлик хабарида.
Хабарда айтилишича, назорат ва мониторинг ишлари давом эттирилмоқда, ҳар бир қонунбузарлик ҳолати бўйича қонуний чоралар кўрилади.
Тошкент шаҳар ҳокимлиги уй-жой харид қилишда ниҳоятда эҳтиёткор бўлишга чақирди ва қуйидагиларни тавсия қилди:
- сотиб олаётган кўчмас мулкингизга оид барча ҳужжатларнинг асл нусхаларини (кадастр, экспертиза хулосалари ва кенгаш қарорлари, техник кўрик далолатномаси) талаб қилинг ва уларни синчковлик билан текширинг;
- сотувчиларга пулни нақд ёки норасмий йўллар билан берманг, шартноманинг барча бандларини диққат билан ўрганиб чиқинг;
- қурувчи ёки объектнинг қонунийлиги хусусида озгина шубҳа туғилса, шунингдек, компания ҳужжатларни тақдим этишни пайсалга солса, Тошкент шаҳар ҳокимлигининг расмий ботига мурожаат этинг. Сизга объектнинг қонуний мақоми ҳақида маълумот берилади.
Ҳокимлик тадбиркорлар ва қурувчиларни қурилиш ёки савдо фаолиятини бошлашдан аввал барча зарур ҳужжатларни расмийлаштириб олишга чақирди.
Изоҳ (0)