Ироқда кучли қум бўрони сабабли салкам икки минг киши нафас қисилишидан азият чекди. Бу ҳақда Aawsat хабар берди.
Бўрон мамлакатнинг кўплаб ҳудудларида кўриш масофасини нолга тенглаштирган. Нажаф ва Басра аэропортларида ҳаво ҳаракатини издан чиқарган. Нажафда кўринувчанлик ёмонлашгани сабабли бешта автоҳалокат содир бўлган.
Полиция ходимлари ва пиёдалар қуюқ чангдан ҳимояланиш учун ниқоб тақишга мажбур бўлмоқда. Бироқ бу одамларни бўғилишдан тўлиқ ҳимоя қила олмаяпти. Жумладан, 1800 дан ортиқ киши нафас қисилишидан азият чекмоқда.
Мамлакат Соғлиқни сақлаш вазирлиги маълумотларига кўра, бўғилиш аломатлари билан касалхоналарга 700 дан ортиқ киши мурожаат қилган. Қум бўрони Саудия Арабистони шарқи ва Ироқ жануби-ғарбидан келаётгани таъкидланган.
Экспертлар фикрича, Ироқда чанг бўронлари сони кўпайиши мумкин. Бирлашган Миллатлар Ташкилоти Ироқни дунёда иқлим ўзгаришидан энг кўп зарар кўрган бешта мамлакатдан бири сифатида эътироф этган.
Ҳавода учиб юрувчи чанг ва қум зарралари астма, бронхит ва бошқа нафас йўллари касалликларини кучайтиради. Бундан ташқари қум зарралари кўзга кириб, қичишиш, яллиғланиш ёки ҳатто кўриш қобилиятининг пасайишига олиб келиши мумкин.
2022 йилда Ироқда кучли қум бўрони оқибатида бир киши вафот этганди, 5 мингдан ортиқ киши нафас йўллари касалликлари билан касалхонага ётқизилган. Экология вазирлиги яқин ўн йилликларда мамлакатда “чанг кунлари” кўпайиши кутилаётганидан огоҳлантирган.
Изоҳ (0)