Munisa Rizayeva farzandini Argentinada dunyoga keltirgani ijtimoiy tarmoqlarda keng muhokama qilingan mavzulardan biriga aylandi. Ayrim vaynerlar ushbu mavzuda qiziqarli videolarni ham suratga oldi. Biroq farzandini xorijda dunyoga keltirgan o‘zbekistonlik mashhurlar orasida Munisa birinchisi emas, quyida shular haqida so‘z boradi.
Asal Saparboyeva
19-mart sanasida Littos taxallusi bilan ijod qiluvchi sportchi bloger Asal Saparboyeva ilk marta ona bo‘ldi. U farzandini Braziliya poytaxti San Paulu shahrida dunyoga keltirdi. Asal Braziliya iqlimi unga yoqqani bois farzandini dunyoga keltirish uchun aynan shu mamlakatni tanlaganini ma’lum qildi.
Munisa Rizayeva
39 yoshli xonanda Munisa Rizayeva 2024-yilda uzoq kutilgan onalik baxtiga sazovor bo‘ldi. Xonanda turmush o‘rtog‘i bilan kelishgan holda o‘g‘lini Argentina poytaxti Buenos Ayresda dunyoga ketirishga qaror qildi.
“Birinchidan, Argentinaning tibbiyot darajasi dunyo bo‘yicha 33-o‘rinda turadi. Ikkinchidan, Argentinaning kattaligi sabab bu yerda har xil madaniyatlar va har xil ob-havoni ko‘rish mumkin. Uchinchidan esa, hamma bilgan Messi, Maradona, steyk, folklor musiqa, Buenos Ayresning g‘ayritabiiy ko‘cha san’ati haqida bilish menga ham qiziq bo‘ldi. To‘rtinchi va asosiy sabab bu — turmush o‘rtog‘imning xohishi bo‘ldi”, degan edi Munisa Rizayeva.
Munisa o‘g‘li bilan fevral oyida Toshkentga qaytdi, u Argentinadagi tibbiyotdan ko‘ngli to‘lmagani haqida ham so‘zlab berdi.
“Bolamning qorni ko‘p og‘rib, juda ko‘p yig‘lardi. Biz dorixonadan umuman dori sotib ololmasdik. Chunki dorilar faqat retsept asosida sotiladi. Shifokorga borsak 1 yoshgacha hech qanday dori mumkinmas, deyishardi. Shuning uchun ham Toshkentga qaytishga majbur bo‘ldik”, dedi Munisa Rizayeva.
Shahlo Zoirova
Komik aktrisa Shahlo Zoirova 2023-yilning iyul oyida to‘rtinchi marta ona bo‘ldi. Shahlo ham ayrim hamkasblari singari o‘g‘lini xorijiy mamlakatda — Turkiyaning Istanbul shahrida dunyoga keltirishni ma’qul ko‘rdi.
— Uch farzandimni tabiiy yo‘l bilan dunyoga keltirganman. To‘rtinchi farzandimda esa sog‘lig‘imdagi o‘zgarishlar sabab shifokorlar kesarcha kesish amaliyoti qo‘llanishini aytishdi. Buning ustiga allergiyam qo‘zidi. Toshkent juda issiq bo‘lgani uchun juda qiynaldim. Shu paytda dugonam Asal Shodiyeva agar imkon bo‘lsa, Istanbulga borishimni maslahat berdi, degan edi Shahlo Zoirova.
Asal Shodiyeva
Shohruxxon va Asal Shodiyeva juftligi 2022-yilda ikkinchi marta ota-ona bo‘ldi. Ularning o‘g‘li Istanbuldagi shifoxonalardan birida dunyoga keldi. Yulduzli juftlik o‘g‘liga Baxtiyor deb ism qo‘ydi. Ular farzandlarini ijtimoiy tarmoqlar orqali ko‘rsatishmaydi. Biroq aktrisa o‘g‘illarining kimga o‘xshashi haqidagi savollarga javob berar ekan, to‘ng‘ich farzandi Muhammadyusuf dadasiga, Baxtiyor esa onasiga o‘xshashini aytib o‘tgan.
Lola
Xonanda Lola 2020-yilning yozida uchinchi marta ona bo‘ldi. U qizalog‘ini Moskva shahrida joylashgan nufuzli klinikalardan birida dunyoga keltirgan. Xonanda qizi Aisha bilan muntazam ravsihda qiziqarli videolar tayyorlab, ularni ijtimoiy tarmoqlardagi sahifalariga joylab boradi.
Zarina Nizomiddinova
Aktrisa Zarina Nizomiddinova 2020-yilning mart oyida ikkinchi marta onalik baxtiga sazovor bo‘ldi. U o‘sha paytda turmush o‘rtog‘ining ishi tufayli Rossiyada yashayotgan edi, shuning uchun aktrisa farzandini Moskva shahridagi klinikalardan birida dunyoga keltirgan. Chaqaloqqa Saidumar deya ism qo‘yilgan. Zarina o‘g‘li Saidumarga ham alohida Instagram sahifasi ochgan hamda qisqa muddat ichida 100 ming kuzatuvchi to‘plagan edi. U o‘g‘lining mashhur tennischi bo‘lishini orzu qilishi haqida so‘zlab bergan. Aktrisa Saidumarning tennis mashg‘ulotlari aks etgan videolarni muntazam ravishda sahifasiga joylab boradi.
Ganya Usmonova
Milliarder Alisher Usmonovning jiyani, instabloger Ganya Usmonova bugungi kunda ikki qizning onasi. U ikkala farzandini ham Moskva shahridagi klinikada dunyoga keltirgan.
Izoh (0)