Ҳарорат пасайиши, ёмғир, қор: “Ўзгидромет” ҳафталик прогнозни эълон қилди

“Ўзгидромет” иш ҳафтаси давомида кузатиладиган об-ҳаво ҳақида маълумот берди.

Унга кўра, 20 январь, душанба куни Ўзбекистон бўйлаб ёғингарчилик кутилмайди, кундузи ҳаво ҳарорати 7-12 даражагача, жанубий ҳудудларда баъзи жойларда 15 даражагача илиқ бўлади. Шамол тезлиги айрим жойларда 15-20 метр/секундгача кучайиши мумкин.

21 январь, сешанба куни республиканинг катта қисмида ёмғир ёғади, шимолда қорга айланади. Айрим тоғолди ва тоғли ҳудудларда кучли ёғингарчилик бўлиши мумкин. Фақат Фарғона водийси ҳудудларида ёғингарчилик эҳтимоли паст. Ҳаво ҳарорати кечаси 0-5 даража илиқ, кундузи 5-10 даража илиқ бўлади.

Чоршанба куни мамлакат ҳудудига Волга бўйидан нам ва совуқ ҳаво массалари кириб келиши, Ўзбекистон бўйлаб ёғингарчилик (ёмғир қорга айланади) бўлиши кутилмоқда, Қорақалпоғистон Республикаси, Хоразм вилоятида ёғингарчилик кутилмайди. Ҳаво ҳарорати кечаси ва кундузи 0-5 даража илиқдан ошмайди.

Пайшанба куннинг биринчи ярмида республиканинг фақат марказий ва шарқий ҳудудларида қор ёғиши кутилмоқда. Ҳаво ҳарорати кечаси 2-7 даража совуқ, кундузи 2 даража совуқ — 3 даражагача илиқ, шимолий ҳудудларда кечаси 8-13 даража совуқ, кундузи 0-5 даража совуққача пасайиши кутилмоқда.

Жума куни Ўзбекистонда ёғингарчилик кутилмайди, ҳаво ҳарорати кечаси 2-7 даража совуқдан ошмайди, кундузи 2-7 даража илиққача, шимолда кечаси 8-13 даража совуқ, кундузи 2 даража совуқ — 3 даража илиқ бўлади.

Ҳафта давомида республика бўйлаб туман тушиши мумкин. Шамол шарқдан ғарбга ўзгариб турган ҳолда 7-12 метр/секунд тезликда эсади, 21—23 январь кунлари айрим жойларда 13-18 метр/секундгача кучаяди. 21—22 январь кунлари 20-23 метр/секундгача кучайиши мумкин.

Тошкентда 20 январь куни ёғингарчилик кутилмайди, ҳаво ҳарорати 10-12 даражагача илиқ бўлади. 21 январь, сешанба куни вақти-вақти билан ёмғир ёғади, кечаси ва эрталаб туман тушиши мумкин, ҳаво ҳарорати кечаси 2-4 даража илиқ, кундузи 8-10 даража илиқ бўлади. Чоршанба куни ёмғир ёғиши, қорга айланиши кутилмоқда, кечаси ва эрталаб туман тушиши мумкин. Пайшанба куни кечаси ва эрталаб қор ёғиши мумкин. Ҳаво ҳарорати кечаси 4-6 даража совуқ, кундузи 1 даража совуқ — 1 даража илиқ бўлади.