Қирғизистон президенти Садир Жапаровнинг Ўзбекистонга ташрифи муносабати билан юртимизда қирғиз маданияти кунлари ташкил этилди.
Маданият кунлари доирасида Тошкентдаги “Мовий гумбазлар” хиёбонида “Қирғиз овули” номли кўргазма ва концерт дастури намойиш этилди. Унда қардош миллат вакиллари, санъат ва маданият намояндалари иштирок этди.
Хиёбонда қирғиз маданиятига хос тарзда кулранг ўтовлар ва ярим бўз уйлар ўрнатилди, миллий санъат маҳсулотлари кўргазмаси ташкил этилди.
Бахшилар энг узун эпос дея таърифланадиган “Манас” достонидан парча ижро этди.
Ўзбекистон Маданият вазирининг биринчи ўринбосари Авазхон Тожихонов ва Қирғизистон Республикаси Маданият вазири биринчи ўринбосари Тимурлан Ажималиев икки қардош халқ дўстлиги минг йиллардан бери давом этиб келаётганини таъкидлади.
“Қирғиз ва ўзбек халқи азалдан бир-бирига елкадош бўлиб келган. Ўзбекистонда қирғиз миллати маданияти кунлари давом этмоқда. Мисол учун, бугун ўзбек ва қирғиз зиёлилари учрашуви, қирғиз киноси кунларининг очилиш маросими бўлиб ўтди. Мақсад халқларимизни янада бирдамликка чорлаш”, дейди Авазхон Тожихонов.
Тадбирда 20 дан ортиқ куй-қўшиқлар ижро этилди, ҳунармандчилик маҳсулотлари кўргазмасига эса Ўзбекистонда яшовчи бошқа миллат ва элат вакиллари ҳам катта қизиқиш билдирди. Айниқса, миллий рақслар томошабинларнинг эътирофларига сазовор бўлди. Концерт дастури бахшилар ижросидаги “Манас” достони билан якунланди.
Юртимизда Қирғизистон маданияти кунлари доирасида концертлар, ҳунармандчилик маҳсулотлари кўргазмалари, фильмлар ва театр асарлари намойиши давом этмоқда.
Изоҳ (0)