Toshkentda “Qirg‘iz ovuli” ko‘rgazmasi bo‘lib o‘tdi (fotoreportaj)

Qirg‘iziston prezidenti Sadir Japarovning O‘zbekistonga tashrifi munosabati bilan yurtimizda qirg‘iz madaniyati kunlari tashkil etildi. 

Madaniyat kunlari doirasida Toshkentdagi “Moviy gumbazlar” xiyobonida “Qirg‘iz ovuli” nomli ko‘rgazma va konsert dasturi namoyish etildi. Unda qardosh millat vakillari, san’at va madaniyat namoyandalari ishtirok etdi.

Xiyobonda qirg‘iz madaniyatiga xos tarzda kulrang o‘tovlar va yarim bo‘z uylar o‘rnatildi, milliy san’at mahsulotlari ko‘rgazmasi tashkil etildi. 

Baxshilar eng uzun epos deya ta’riflanadigan “Manas” dostonidan parcha ijro etdi. 

O‘zbekiston Madaniyat vazirining birinchi o‘rinbosari Avazxon Tojixonov va Qirg‘iziston Respublikasi Madaniyat vaziri birinchi o‘rinbosari Timurlan Ajimaliyev ikki qardosh xalq do‘stligi ming yillardan beri davom etib kelayotganini ta’kidladi.

“Qirg‘iz va o‘zbek xalqi azaldan bir-biriga yelkadosh bo‘lib kelgan. O‘zbekistonda qirg‘iz millati madaniyati kunlari davom etmoqda. Misol uchun, bugun o‘zbek va qirg‘iz ziyolilari uchrashuvi, qirg‘iz kinosi kunlarining ochilish marosimi bo‘lib o‘tdi. Maqsad xalqlarimizni yanada birdamlikka chorlash”, deydi Avazxon Tojixonov.

Tadbirda 20 dan ortiq kuy-qo‘shiqlar ijro etildi, hunarmandchilik mahsulotlari ko‘rgazmasiga esa O‘zbekistonda yashovchi boshqa millat va elat vakillari ham katta qiziqish bildirdi. Ayniqsa, milliy raqslar tomoshabinlarning e’tiroflariga sazovor bo‘ldi. Konsert dasturi baxshilar ijrosidagi “Manas” dostoni bilan yakunlandi.

Yurtimizda Qirg‘iziston madaniyati kunlari doirasida konsertlar, hunarmandchilik mahsulotlari ko‘rgazmalari, filmlar va teatr asarlari namoyishi davom etmoqda.