Стратегик ислоҳотлар агентлиги Ўзбекистонда автомобиль ойналарини рухсатномасиз қорайтирганлик учун белгиланган жарима миқдорини камайтиришни таклиф қилди. Бу ҳақда агентлик расмий сайтида хабар берилди.
Хабарда келтирилишича, агентлик маъмурий чоралар ва уларнинг содир этилган ҳуқуқбузарликка мутаносиблигини ўрганган. Натижаларга қараганда, мамлакатда маъмурий жарималар миқдорини белгилаш механизмлари йўқлиги содир этилган ҳуқуқбузарликка нисбатан номутаносиб жарима солинишига сабаб бўлмоқда.
“Масалан, автомобиль ойналарини рухсатномасиз қорайтирганлик учун назарда тутилган 8,5 миллион сўмлик жарима белгиланганда, рухсатноманинг нархи 11–13 миллион сўм бўлган. Бугунги кунда рухсатнома 2,7 миллион сўм этиб белгиланган, аммо жарима миқдори ўзгаришсиз қолмоқда”, дея қайд этган агентлик.
Таққосланишича, Қозоғистонда автомобиль ойнасини қорайтирганлик учун ўрнатилган жарима 468 минг сўмни, Россияда 60 минг сўмни, Беларусда 138 минг сўмни ташкил қилади.
“Фуқароларнинг соғлиғи ва ҳаёти хавфсизлиги билан боғлиқ қоидабузарликлар автомобиль ойналарини рухсатномасиз қорайтириш учун белгиланган жарималардан устуворлик жиҳатидан муҳимроқ ҳисобланади”, дейилади хабарда.
Маълумот учун, республикада “тонировка” учун рухсатнома бир йил муддатга берилади. “Маъмурий жавобгарлик тўғрисидаги кодекс”ининг 126-моддасига кўра, техник регламентга мувофиқ бўлмаган кўзгусимон ва туси ўзгартирилган (қорайтирилган) ойнали транспорт воситаларидан, худди шунингдек, ҳайдовчининг ўрнидан теварак-атрофни кўришни чеклайдиган қўшимча нарсалар ўрнатилган ёки қопламалар суртилган транспорт воситаларидан фойдаланиш (бундан ойналар тусини ўзгартириш (қорайтириш) учун тегишли рухсатнома берилган транспорт воситалари мустасно) БҲМнинг 25 баравари миқдорида жарима солишга сабаб бўлади. Худди шундай ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, БҲМнинг қирқ баравари миқдорида (13,6 миллион сўм) жарима солишга сабаб бўлади.
Изоҳ (0)