Ўзбекистон ахборот технологиялари соҳасига Британия инвестициялари жалб этилади, деб хабар бермоқда “Дунё” ахборот агентлиги.
Маълум қилинишича, Ўзбекистон рақамли технологиялар вазири ўринбосари Рустам Каримжонов бошчилигидаги делегациянинг Буюк Британияда бир қатор учрашувлари ташкил этилди. Хусусан, Буюк Британия Инвестиция уюшмасининг (British Investment Association — BIA) Молиявий технологиялар бўйича директори Генри Бевли Аъзолик ва ривожланиш департаменти раҳбари Жиллиан Payнтер билан учрашув давомида ушбу ташкилот билан IT соҳасида инвестицияларни бошқариш бўйича кенг қамровли шарҳлар ва статистик маълумотларни алмашиш, ўзбек компанияларига сармоя киритиш бўйича фикр алмашилди.
Музокаралар натижасида Британия Инвестиция уюшмаси ва Рақамли технологиялар вазирлиги ўртасида инвестицияларни бошқариш ва инвестиция киритиш бўйича англашув меморандуми имзоланди.
TransferWise компанияси раҳбарияти билан бўлиб ўтган учрашувда Ўзбекистондан масофавий BPО хизматларини кўрсатиш ва IT инфратузилмага инвестиция киритиш истиқболлари муҳокама қилинди.
Британия томонига Ўзбекистон IT бозорига кириш имкониятлари, яратилган шароитлар, қонунчиликдаги ўзгаришлар, IT компаниялар учун жорий этилган қулайликлар, ишчи кучи, демографик ва географик афзалликлар, инфратузилма, таълим бериш жараёнлари ва мавжуд хорижий компаниялар ҳақида батафсил маълумот берилди.
Учрашув якунида TransferWise компанияси вакилларининг 17—20 сентябрь кунлари Ўзбекистонда бўлиб ўтадиган ICTWееk-2024 ҳафталигида иштирокини уюштириш тўғрисида келишиб олинди.
Изоҳ (0)