Ўзбекистон собиқ бош прокурори Рашид Қодировнинг ўғли — Алишер Қодиров Дубайда 7,9 миллион долларлик кўчмас мулкка эгалик қилади. Бу ҳақда Коррупция ва уюшган жиноятчиликни ўрганиш маркази суриштирувида сўз боради.
Коррупция ва уюшган жиноятчиликни ўрганиш маркази 70 дан ортиқ мамлакат журналистлари билан биргаликда ўз мамлакатида турли жиноятларда айбланаётган Дубайдаги мулк эгалари ҳақида Dubai Uncloted нашрида чоп этди.
Текширув Дубайдаги кўчмас мулк ҳақидаги кўплаб маълумотларнинг сизиб чиқишига асосланади. 2020—2022 йилларда содир бўлган ҳолатлар юз минглаб кўчмас мулк эгалари ҳақидаги маълумотларни ўз ичига олади.
Маълумотларга кўра, рўйхатда 2018 йилнинг март ойидан бошлаб товламачилик ва фирибгарликда гумонланиб, Ўзбекистон ИИВ томонидан қидирувга берилган Алишер Қодиров ҳам бор.
Журналистларга кўра, у қиймати 1,9 миллион доллардан 2 миллион долларгача бўлган тўртта Marina Plaza офисига эгалик қилади.
Ўзбекистоннинг учинчи бош прокурори — Рашид Қодиров
1952 йилда Андижонда туғилган Рашид Қодиров Ўзбекистоннинг учинчи бош прокурори ҳисобланади. У мазкур лавозимда ишлаш бўйича рекордчи саналади — 15 йил 2 ой.
Андижон вилояти прокуратурасида фаолиятини бошлаган Рашид Қодиров 80 йилларда Давлат хавфсизлиги қўмитасида ишлаган. 1991—1994 йилларда МХХ раиси ўринбосари сифатида фаолият олиб борган. Кейинчалик “МХХда 25 йил фидокорона хизмати учун” медали билан ҳам тақдирланган. 1994 йилдан 2000 йилгача бош прокурор ўринбосари лавозимида ишлаб, Ўзбекистонда рўй берган бир неча терактларни тергов қилишга масъул бўлган.
2015—2017 йилларда Конституциявий суд аъзоси бўлган. 2018 йил 23 февралда Рашид Қодиров товламачилик, мансаб ваколатини суиистеъмол қилиш, пора олишда айбланиб ҳибсга олинди. 2019 йил июнида Рашид Қодировга 10 йил озодликдан маҳрум қилиш ва энг кам ойлик иш ҳақининг 500 баравари миқдорида жарима жазоси тайинланди.
2023 йил январида Рашид Қодиров шартли равишда озодликка чиқарилгани тўғрисида хабарлар тарқалди. Инсон ҳуқуқлари “Эзгулик” жамияти раиси Абдураҳмон Ташанов ҳам Қодиров озодликка чиққани ҳақида пост қолдириб, собиқ бош прокурор ҳақида олиниши керак бўлган фильм кўрсатилмаганини эслаган эди.
Изоҳ (0)