Шўрчи туманида электр токи узилиши сабаб ФҲДЁ бўлими уч кундан бери аҳолига хизмат кўрсатмаяпти. Муаммо яна бир ҳафта давом этиши айтилган

Сурхондарё вилоятининг Шўрчи туманидаги ФҲДЁ бўлими биносида электр токи ўчгани боис, бўлимга мурожаат билан келувчилар сўрови рад этилмоқда. Сарсон бўлаётган аҳоли бундан норози. Мурожаатчиларга узилишлар яна бир ҳафта давом этиши маълум қилинган.

Бу ҳақда “Дарё”га шикоят қилган фуқаронинг билдиришича, у биргина маълумотнома олиш учун уч кундан бери овора бўлмоқда. 

Шўрчи туман ФҲДЁ бўлимига биргина ҳужжат олиш учун уч-тўрт кундан бери келамиз. Ишимиз ҳал бўлмаяпти. Ҳа, десак, “свет” йўқ дейишяпти. Ток ўчган пайтда ишни давом эттириш учун “движок” ташкил қилишса бўлмасмиди?, — дейди ҳолатдан норози бўлган фуқаро. 

Мурожаатчига кўра, муаммо бўлим биноси яқинидаги трансформаторнинг носоз ҳолатга келиши билан боғлиқ. 

Трансформаторимиз ёниб кетди дейишяпти. Мана ўша трансформаторнинг аҳволи. Шу ерда ишлайдиган ходимлардан сўрасак, бир ҳафтадан кейин “свет” ёнади дейишяпти. Шунда айни кунгача уч кун сарсон бўлган бўлсак, бу сарсонгарчилик яна бир ҳафта давом этса, фуқаронинг иши 10-15 кунлаб битмайдими? Бунга масъул бўлганларга чора кўришларини сўраган бўлардик, — дейди фуқаро. 

Шикоятчи бино ичи ва ташқарисини тасвирга олар экан, ФҲДЁ бўлимида ҳеч ким йўқлигини кўрсатади.

Бўлимда хоналар ёпиқ. Ҳеч ким йўқ. “Свет” йўқ бўлгач, иш ҳам бўлмайди-да, — дейди у. 

Вазиятни изоҳлаган вилоят Адлия бошқармасининг ОАВ бўйича масъули Бунёд Авазов бино электр токи таъминотидан узилганини тасдиқлади. 

Тармоққа уланувчи тизимда носозлик туфайли узилишлар кузатилган. Бу ҳолат ўтган жума, 29 март куни тушдан сўнг содир бўлган. Кеча душанба куни аҳолига хизмат кўрсатилмаган. Муаммо бугун бартараф этилиши кутилмоқда, — дейди Бунёд Авазов. 

Масъул, журналист билан 1 апрель куни кечки пайт телефон орқали суҳбатлашганда электр токидаги узилиш ва трансформатордаги носозлик тизимга таъсир қилганини, система куйиши рўй берганини билдирганди. 2 апрель куни бу масалага қайтган Бунёд Авазов муаммо шунчаки трансформаторда эканини, тез орада масала ҳал этилишини айтди. 

“Дарё” воқеалар ривожини кузатишда давом этади.