Sho‘rchi tumanida elektr toki uzilishi sabab FHDY bo‘limi uch kundan beri aholiga xizmat ko‘rsatmayapti. Muammo yana bir hafta davom etishi aytilgan

Surxondaryo viloyatining Sho‘rchi tumanidagi FHDY bo‘limi binosida elektr toki o‘chgani bois, bo‘limga murojaat bilan keluvchilar so‘rovi rad etilmoqda. Sarson bo‘layotgan aholi bundan norozi. Murojaatchilarga uzilishlar yana bir hafta davom etishi ma’lum qilingan.

Bu haqda “Daryo”ga shikoyat qilgan fuqaroning bildirishicha, u birgina ma’lumotnoma olish uchun uch kundan beri ovora bo‘lmoqda. 

Sho‘rchi tuman FHDY bo‘limiga birgina hujjat olish uchun uch-to‘rt kundan beri kelamiz. Ishimiz hal bo‘lmayapti. Ha, desak, “svet” yo‘q deyishyapti. Tok o‘chgan paytda ishni davom ettirish uchun “dvijok” tashkil qilishsa bo‘lmasmidi?, — deydi holatdan norozi bo‘lgan fuqaro. 

Murojaatchiga ko‘ra, muammo bo‘lim binosi yaqinidagi transformatorning nosoz holatga kelishi bilan bog‘liq. 

Transformatorimiz yonib ketdi deyishyapti. Mana o‘sha transformatorning ahvoli. Shu yerda ishlaydigan xodimlardan so‘rasak, bir haftadan keyin “svet” yonadi deyishyapti. Shunda ayni kungacha uch kun sarson bo‘lgan bo‘lsak, bu sarsongarchilik yana bir hafta davom etsa, fuqaroning ishi 10-15 kunlab bitmaydimi? Bunga mas’ul bo‘lganlarga chora ko‘rishlarini so‘ragan bo‘lardik, — deydi fuqaro. 

Shikoyatchi bino ichi va tashqarisini tasvirga olar ekan, FHDY bo‘limida hech kim yo‘qligini ko‘rsatadi.

Bo‘limda xonalar yopiq. Hech kim yo‘q. “Svet” yo‘q bo‘lgach, ish ham bo‘lmaydi-da, — deydi u. 

Vaziyatni izohlagan viloyat Adliya boshqarmasining OAV bo‘yicha mas’uli Bunyod Avazov bino elektr toki ta’minotidan uzilganini tasdiqladi. 

Tarmoqqa ulanuvchi tizimda nosozlik tufayli uzilishlar kuzatilgan. Bu holat o‘tgan juma, 29-mart kuni tushdan so‘ng sodir bo‘lgan. Kecha dushanba kuni aholiga xizmat ko‘rsatilmagan. Muammo bugun bartaraf etilishi kutilmoqda, — deydi Bunyod Avazov. 

Mas’ul, jurnalist bilan 1-aprel kuni kechki payt telefon orqali suhbatlashganda elektr tokidagi uzilish va transformatordagi nosozlik tizimga ta’sir qilganini, sistema kuyishi ro‘y berganini bildirgandi. 2-aprel kuni bu masalaga qaytgan Bunyod Avazov muammo shunchaki transformatorda ekanini, tez orada masala hal etilishini aytdi. 

“Daryo” voqealar rivojini kuzatishda davom etadi.