АҚШ Ғазо сектори аҳолисига 180 миллион долларлик инсонпарварлик ёрдами етказиб берди. Бу ҳақда Пентагон матбуот котиби Патрик Райдер “Ал-Қаҳира ал-Ихбария” телеканалига берган интервьюсида маълум қилган.
“Қўшма Штатлар аллақачон Ғазо секторига 180 миллион долларлик ёрдам кўрсатган ва биз қуруқликдаги йўлакларни ёрдам етказиб бериш учун энг мос деб ҳисоблаймиз”, — деб таъкидлади у.
Пентагон вакилининг сўзларига кўра, АҚШ Исроилга ўз позициясини, яъни “Ғазо секторининг тинч аҳолисини ҳимоя қилиш зарурлигини” етказишга ҳаракат қилмоқда.
Миср телевидениеси билан суҳбат чоғида Райдер можарони Ғазо секторидан ташқарига кенгайиши масаласини ҳам кўтарди ва хусусан, Америка маъмурияти ҳозирда “Ливан ва Исроил ўртасидаги можаронинг кучайишига йўл қўймаслик учун минтақавий шериклар билан ҳамкорликда ишламоқда”, деб таъкидлади.
“АҚШ Яқин Шарқда 7 октябрдан бери кучайиб бораётган кескинликдан ўта хавотирда ва уларни ҳар томонлама жиловлашга ҳаракат қилмоқда”, — деди Патрик Райдер.
Изоҳ (0)