Ўзбекистонда 2024 йил ҳосили учун 1 миллион гектар майдонларда ғўза навлари экиш режалаштирилган. Бу ҳақда “Ўзагроинспекция” ахборот хизмати хабар берди.
Қайд этилишича, ушбу ғўза навларини экиш учун 50 минг тонна уруғлик чигит талаб этилади. Ғўза навларининг иқлим шароитига мос 22 та эртапишар, 3 та ўртапишар, 4 та ингичка толали ҳамда 24 истиқболли ва янги навларни экиш режалаштирилган.
Шунингдек, республика бўйича мавжуд 46 та уруғлик чигит тайёрлаш цехлари тўлиқ ишлаши учун барча зарурий чоралар кўрилган. Уруғлик чигитларни қадоқлаш учун етарли миқдорда қоп ва ёрлиқлар, кимёвий препаратлар захираси яратилган.
Мавсум бошидан режага нисбатан 45,5 минг тонна ёки 81,3 фоиз уруғлик чигит тозаланиб, сараланган ва бу ишлар давом эттирилмоқда.
Қолаверса, мавсум давомида ҳудудий бошқарма ва туман бўлими ходимлари томонидан 188 та назорат тадбирлари олиб борилиб, аниқланган камчиликлар юзасидан огоҳлантиришлар берилиши таъминланган, — дейилади хабарда.
Эслатиб ўтамиз, 2023 йил декабрь ўрталарида Ўзбекистонда келгуси йилдан пахта етиштириладиган майдонларнинг 10 фоизига тажриба-синов тариқасида хорижий пахта навларини экишга рухсат берилиши айтилган эди. Шунингдек, чигит экилишидан аввал фермер хўжаликлари ва вилоят ичидаги кластер ўртасида тупроқ ҳосилдорлиги доирасида фьючерс шартномалари Товар-хомашё биржасининг “пахта хомашёси секцияси”да ҳар бир ҳудуд учун ўтказиладиган савдолар орқали тузилади.
Изоҳ (0)