Самарқанд вилоятида масжид ўрнига боғча қурган аёл бугунги кунда 40 нафар етим болага бепул таълим-тарбия бермоқда. Бу ҳақда Мактабгача таълим агентлиги хабар берди.
Маълум қилинишича, 2019 йилда Самарқанд вилоятида қуввати 250 ўринли мактабгача таълим ташкилоти давлат-хусусий шерикчилик асосида фаолият бошлади. Бугунги кунда боғчага 200 нафардан ортиқ бола қамраб олинган. Улардан 40 нафари етим болалар бўлиб, улар бепул таълим-тарбия олмоқда. 32 нафар ёрдамга муҳтож оилаларнинг фарзандлари имтиёзли 150 минг сўмлик тўлов ва қолган тарбияланувчилар эса ота-оналар бадали орқали таълим-тарбия олмоқда.
Давлат-хусусий шерикчилик асосида фаолият олиб бораётган боғча лойиҳаси 11 миллиард сўм бўлиб, 3 миллиард сўми давлат томонидан кредит, қолган 8 миллиард сўми тадбиркор маблағи эвазига иш бошлаган. Хусусий боғча мудираси Дилфуза Маъруфова боғча қурилиб, ишга тушишидан олдин етим болаларни бепул тарбия қилишни мақсад қилган.
“Турмуш ўртоғим масжид қуришни мақсад қилган пайтларида ён-атрофимиздагилар боғча ҳам масжиддек жой, шунинг учун болалар боғчаси қуринглар, дея маслаҳат берган. Маслаҳатлардан куч олиб, ушбу боғча фаолиятини йўлга қўйганмиз. Ҳар бир болани оилавий шароити билан яқиндан танишган ҳолда боғчага қабул қиламан. Бугунги кунда муассасасада инглиз тили, шахмат-шашка, каратэ, гимнастика, ментал арифметика, хореография тўгараклари иш олиб бормоқда”, — дейди Дилфуза Маъруфова.
Дилфуза Маъруфова 20 йил давомида Самарқанддаги мактаблардан бирида олий тоифали педагог сифатида фаолият юритган.
Изоҳ (0)