Блогер Аброр Мухтор Алий (Аброр Абдуазимов) ҳибсга олингани ҳақида хабар берилган эди. Унга суд қарори билан 15 сутка маъмурий қамоқ ва 340 минг сўм жарима жазоси берилган.
“Дарё” танишиб чиққан суд қарорида келтирилишича, 6 февраль куни Шайхонтоҳур туман ҳокимлигига иш билан келган Аброр Абдуазимов ва Хусрав Насруллаев бақир-чақир қилиб жанжал кўтарган. Уларнинг ўзаро жанжалига аниқлик киритиш мақсадида келган милиция ходимлари қонуний талабларини бажармаган. Ходимларга бўйсунмасдан, оммани ўзига жалб қилиб, ИИО ходимларига нисбатан сохта уйдирмаларни тарқатгани аниқланган.
Суд мажлисида ҳар икки ҳуқуқбузар жаҳл устида жанжал кўтарганини ва ИИО ходимлари талабларини бажармаганини тан олиб, қилмишидан пушаймонлигини, бу каби ҳолат бошқа такрорланмаслигини билдириб, суддан енгиллик беришни сўраган.
Аброр Абдуазимов ва Хусрав Насруллаев Маъмурий жавобгарлик тўғрисидаги кодексининг 194-модда (Ички ишлар органлари ходимининг қонуний талабларини бажармаслик) ва 195-моддасида (Ички ишлар органлари ходимларининг ўз хизмат бурчларини бажаришларига қаршилик кўрсатиш) ифода қилинган ҳуқуқбузарликни содир этишда айбли деб топилган. Уларга 15 сутка маъмурий қамоқ ва БҲМнинг 1 баравари, яъни 340 минг сўм жарима жазоси тайинланган.
Суд айбланувчиларга нисбатан жазо тайинлашда уларнинг айбига иқрорлиги билан бирга, оилавий ва моддий шароити оғирлигини, шунингдек, ҳуқуқбузарликнинг жамоат жойида содир этилганини инобатга олиб, маъмурий қамоқ жазосини қўллашни лозим деб топган. Улар қамоқда сақлаш билан боғлиқ харажатлардан озод қилинган.
Изоҳ (0)