“Реал” Килиан Мбаппега Винисиус Жуниор ва Жуд Беллингҳемдан кўра кўпроқ пул тўламоқчи эмас.
Мбаппеда ҳозир иккита вариант бор: ёзда эркин агент сифатида “Реал” сафига ўтиш ва “ПСЖ” билан шартномани узайтириш. Футболчи ҳозирча келажаги борасида қарор қабул қилгани йўқ, — дея хабар бермоқда ESPN.
Мадридликлар 2024/25 йилги мавсум учун режаларни тузишни бошлаши кераклиги сабабли Килиандан яқин ҳафталарда якуний қарорни айтишни сўраган.
“Мадрид” ўтган йили ҳам Мбаппе билан шартнома имзолашга уриниб кўрганди. Бу сафарги таклифда молиявий ҳолат ўтган сафаргисидан камроқ бўлади. “Қаймоқранглилар” французга Винисиус Жуниор ва Жуд Беллингҳемдан кўпроқ пул тўламоқчи эмас. Иккала футболчи йилига 10,5 миллион евродан маош олади.
“ПСЖ” билан амалдаги шартномасига кўра, Килиан йилига 37 миллион евро ишлаб топади. Парижликлар янги битимда ҳам худди шу суммани таклиф қилмоқда.
Шунингдек, ҳужумчи билан музокараларни шахсан “Реал” президенти Флорентино Перес олиб боради. Перес 2022 йилда Мбаппедан рад жавобини олганидан ҳафсаласи пир бўлса ҳам, яна бу ишга қўл урмоқчи. Флорентино футболчи билан алоқани тўхтатгани йўқ.
Килиан жорий мавсум “ПСЖ” сафида 26 та ўйинда иштирок этиб, 28 та гол ва 6 та голли узатмага муаллифлик қилди.
Изоҳ (0)