Ҳиндистон ҳукумати ҳарбий дронлар ишлаб чиқарувчиларига Хитой компонентларидан фойдаланишни тақиқлади. Бу ҳақда Reuters хабар берди.
Қарор Хитой томонидан жосуслик ва киберҳужумлар хавфи кучайган шароитда миллий хавфсизликни таъминлаш зарурати билан боғлиқлиги айтилган. Маҳаллий дронларда Хитойнинг электрон, радиотехника ва оптикасидан фойдаланиш натижасида Ҳиндистон Қуролли кучларига зарар етиши мумкинлиги илгари сурилган.
Манбаларга кўра, ҳозирда Ҳиндистонда ишлаб чиқарилган дронлар учун компонентларнинг 70 фоизи Хитойдан келтирилади.
“Қарор хавфсизликдаги заифликлар ва ядро қуролига эга қўшнилар ўртасида кескинлик кучайиши билан боғлиқ хавотирлар фонида қабул қилинди”, — дейилади хабарда.
Ҳиндистоннинг ёндашуви 2020 йилдан бошлаб разведкачи дронларни олиб киришга босқичма-босқич чекловлар киритишидан бошланди.
Февраль ва март ойларида дронлар тендерларни муҳокама қилиш бўйича иккита учрашувда ҳинд ҳарбийлари потенсиал иштирокчиларга “Ҳиндистон билан қуруқликдаги чегаралари бўлган мамлакатларнинг компонентлари хавфсизлик нуқтаи назаридан қабул қилиниши мумкин эмаслигини” айтди.
“Ҳиндистон саноати киберҳужумлардан қўрқишига қарамай, дунёдаги иккинчи йирик иқтисодиётга қарам бўлиб қолган”, — дейди Мудофаа вазирлигидаги аноним манба.
Пекин киберҳужумларга алоқадорлигини рад этади.
Ҳиндистон 2023—2024 йилларда қуролли кучларни модернизация қилиш учун 1,6 триллион рупий (19,77 миллиард доллар) ажратди, шундан 75 фоизи маҳаллий саноатга йўналтирилган.
Аммо Хитой компонентларини тақиқлаш ҳарбий дронларни маҳаллий ишлаб чиқариш харажатларини ошириб, ишлаб чиқарувчиларни бутловчи қисмларни бошқа жойдан олишга мажбур қилди.
Изоҳ (0)