Ўзбекистонда ҳоким ўринбосарлари Жаҳон иқтисодиёти ва дипломатия университети ҳузуридаги дипломатик академияда малака оширади. Бу ҳақда Норма хабар берди.
Қайд этилишича, Вазирлар Маҳкамасида «Жаҳон иқтисодиёти ва дипломатия университети ҳузуридаги дипломатик академияда дипломатик лавозимларга тайинланадиган номзодларни ўқитиш, шунингдек, айрим лавозимдаги мутахассисларни қайта тайёрлаш ва уларнинг малакасини ошириш тизимини жорий этиш чора-тадбирлари тўғрисида»ги қарор қабул қилинган.
Ҳужжатга мувофиқ, дипломатик лавозимларга тайинланаётган номзодлар Жаҳон иқтисодиёти ва дипломатия университети ҳузуридаги дипломатик академияда ўқиши лозим. Муддати 5 кундан 1 йилгача (25 дан 1152 соатгача) бўлган ўқув курслари анъанавий ва масофавий шаклларда ташкил этилади.
Сўнгги 3 йилда хорижий давлатлардаги тайёрлов ва малака ошириш курсларида ўқиш муқобил тайёрлашдан ўтиш ҳисобланади. Муқобил тайёрлашдан ўтган тингловчиларнинг хорижий давлатларда олган таълим тўғрисидаги ҳужжати (сертификати) асосида уларга нисбатан сертификат амал қилиш муддати давомида академия ўқув курсларида ўқиш талаб этилмайди.
Ўқув курслари якуни бўйича тингловчилар ёзма шаклда имтиҳон топширишади. 55 ва ундан юқори балл тўплаган тингловчиларга ўқув курсларини тугатганлик тўғрисида сертификат берилади.
Қорақалпоғистон Республикаси Вазирлар Кенгаши раисининг, вилоятлар ва Тошкент шаҳар, шунингдек, туман (шаҳар) ҳокимларининг инвестициялар ва ташқи савдо масалалари бўйича ўринбосарлари ҳамда ташқи сиёсий, ташқи иқтисодий ва халқаро-ҳуқуқий фаолият соҳасидаги мутахассислари ҳар уч йилда бир марта академияда ўқиши шарт.
Изоҳ (0)