Украинадаги урушда Россия томонидан жанг қилиб, ҳалок бўлган 23 ёшли замбиялик талаба Лемехани Натана Ниренданинг жасади ватанига қайтарилди. Бу ҳақда Associated Press хабар бермоқда.
Ниренда 22 сентябрь куни Украинадаги жанг майдонида ҳалок бўлгани ҳақида хабар берилганди. 11 декабрь куни жасад Замбия пойтахти Лусака шаҳридаги Кеннет Каунда халқаро аэропортига келтирилди.
Маълум бўлишича, Ниренда Россияга 2019 йилда келган ва Москва муҳандислик-физика институтида таҳсил олган. У курьер бўлиб ишлаган. 2020 йилда йигит етказиб бераётган ўрамидан гиёҳванд моддалар топилгани учун қўлга олинган. У 9,5 йилга озодликдан маҳрум этилган.
Лемеханининг опаси айтишича, у охирги марта 31 октябрь куни яқинларига қўнғироқ қилган.
«У ўшанда ота-онамга ‘Мен энди қамоқда эмасман, аммо қаерда эканим сир» деган. Бу ота-онамни ва барчамизни катта ташвишга солди. Биз унинг чет давлатда маҳбус экани, у ерда ҳеч қандай ҳуқуқлари йўқлигини билардик, нима бўлаётганидан жуда хавотирда эдик, лекин у тафсилотларни ошкор этолмади, ота-онам ҳам уни бунга мажбурламади», — деди марҳумнинг опаси.
Кейинчалик «Вагнер» хусусий ҳарбий компанияси раҳбари Евгений Пригожин Ниренда компанияга ёлланганини тасдиқлади. У замбиялик билан гаплашганини эслаб, унга «Бу уруш сизга нима учун керак?» деган саволни берганини айтди.
Талаба эса гўёки шундай жавоб берган: «Сиз руслар кўп йиллар давомида биз африкаликларга мустақилликка эришишда ёрдам бергансиз. Бизга оғир пайтда қўл чўзгансиз ва ҳозир ҳам бу давом этмоқда. ‘Вагнер’ минглаб африкаликларни қутқармоқда ва агар мен сиз билан урушга борсам ҳам бу сизлардан қарзимни тўлашга камлик қилади. Тирик қолсам, ватаним учун курашишни ўрганаман. Яна бир нарса, бу мен учун катта шараф, ‘Вагнер’ ҳақида фақат миш-мишлар орқали биламан, лекин мен энди сизларнинг сафингизга қўшилишим мумкин».
Украина Ташқи ишлар вазирлиги Замбия фуқароси Украинадаги жангда ҳалок бўлганига муносабат билдирган. ТИВ спикери Олег Николенко ҳодиса ҳақида фикр билдириб, Африка етакчиларини ўз фуқароларини Украинага қарши курашга йўл қўймасликка чақирган.