СЭС: Ўзбекистонда ОИВ инфекцияси 74 фоиз ҳолатларда жинсий йўл билан юққан

АОКАда ўтказилган брифингда Санитария-эпидемиологик осойишталик ва жамоат саломатлиги хизмати бошлиғи ўринбосари Ботиржон Қурбонов Ўзбекистонда ОИТСга қарши кураш соҳасида амалга оширилаётган ишлар ҳақида маълумот берди.

Қайд этилишича, ҳар йили республикада 4—4,5 миллион аҳоли ОИВ инфекциясига текширувлар билан қамраб олинмоқда. 0,1 фоиз ҳолатларда касаллик аниқланмоқда, бу эса аҳоли ўртасида касалликнинг камайиб бораётганидан дарак беради.

Бундан 10 йиллар аввал 700 000 нафар аҳоли ОИВ инфекцияга текширилган ва касаллик аниқланиш кўрсаткичи 0,42—0,45 фоизни ташкил этган. Касалликнинг онадан болага юқиш кўрсаткичи эса 4,8 фоиздан 0,6 фоизгача камайган.

2009 йилларда республикада ОИВ инфекцияси 60,8 фоиз ҳолатларда парентерал йўл билан юққан бўлса, сўнгги йилларда бутун дунёда қайд этилаётган ҳолатга Ўзбекистонда ҳам кузатилган. Маълумотларга кўра, 74 фоиз ҳолатларда касалликни жинсий йўл билан юққанини кўриш мумкин. Инфекция орқали гиёҳванд моддаларни қабул қилувчилар ичида ОИВнинг тарқалиши 5,1 фоиздан 2,9 фоизгача камайган.

Ҳар йили ОИВ инфекцияли оналардан туғилган 6 ойликкача бўлган 600 нафар болани сунъий қуруқ сут аралашмалари билан таъминлаш механизми яратилган. 18 ёшгача бўлган ОИВ инфекцияли болалар эса касаллик аниқланиши билан ижтимоий нафақа билан таъминланмоқда.