Сауль Альварес Мексика либосини ерда қолдирган Мессини кескин танқид қилди. Мексика сардори бу вазиятда Леонинг ёнини олди (видео)

Профессионал бокс бўйича супер ўрта вазн тоифасининг мутлақ чемпиони Сауль Альварес Аргентина терма жамоаси ҳужумчиси Лионель Мессига таҳдид қилди. Бу ҳолат ижтимоий тармоқларда кенг муҳокамаларга сабаб бўлди.

Мексикага қарши ўйиндан кейин Месси рақиб футболчиларидан бири билан либос алмашган. Аргентина кийиниш хонасида ғалабани нишонлаётгани тасвирланган видеолар тарқалди. Унда Мексика терма жамоаси либоси оёқ остида ётгани ва Месси кийим алмаштириш чоғида унга тегиб кетгани тасвирга тушиб қолган. Ушбу ҳолат мексикалик боксчига ёқмади.

«Месси бизнинг либос ва байроқ билан полни қандай артганини кўрдингизми? Аргентина Мексикани қанчалик ҳурмат қилса, биз ҳам Аргентинага шундай жавоб қайтаришимиз керак! Мен мамлакат ҳақида гапирмаяпман, Месси ва унинг қилиғи ҳақида айтяпман.

Месси менга дуч келиб қолмасликни сўраб илтижо қилсин», — дея ёзди «Канело».

Шундан кейин футбол жамоатчилиги, хусусан, футболчилар Серхио Агуэро ва Сеск Фабрегас боксчига кийиниш хонасидаги вазиятни тушунтиришга уринди. Бироқ Альварес Агуэрони ҳам ҳақорат қилди.

Охир-оқибат вазиятга Мексика терма жамоаси сардори Андрес Гуардадо аралашди.

«Мен Лео қандай инсон эканини биламан. Афсуски, Альварес кийиниш хонасида нималар содир бўлишини билмайди, шу боис Мексика терма жамоаси либоси ерда ётгани айримларнинг андишасига тегганини тушунаман.

Менга бу аҳмоқона ишдек кўринди. Бу эътиборга лойиқ вазият эмас. Бу гапларнинг ҳаммаси — низо яратиш ва машҳурликка эришишга уриниш.

Терлашдан кейин нам бўлган либосни полда қолдирсанг, уни ювишга олиб кетишади. Агар у ерда турмаса, уни ювишга олишмайди ва ўзинг билан олиб кетишингга тўғри келади.

Бу либос меники, биз Лео билан ўйиндан кейин либос алмашдик. Мессидан ҳар сафар нимадир сўрасам, футболка алмашиш ёки ўғлим билан суратга тушиш, у ҳар доим рози бўлади. Мен ҳам унинг либосини кийиниш хонасининг полида қолдирдим, ювишга олиб кетишлари учун», — дейди Гуардадо.