Professional boks bo‘yicha super o‘rta vazn toifasining mutlaq chempioni Saul Alvares Argentina terma jamoasi hujumchisi Lionel Messiga tahdid qildi. Bu holat ijtimoiy tarmoqlarda keng muhokamalarga sabab bo‘ldi.
Meksikaga qarshi o‘yindan keyin Messi raqib futbolchilaridan biri bilan libos almashgan. Argentina kiyinish xonasida g‘alabani nishonlayotgani tasvirlangan videolar tarqaldi. Unda Meksika terma jamoasi libosi oyoq ostida yotgani va Messi kiyim almashtirish chog‘ida unga tegib ketgani tasvirga tushib qolgan. Ushbu holat meksikalik bokschiga yoqmadi.
“Messi bizning libos va bayroq bilan polni qanday artganini ko‘rdingizmi? Argentina Meksikani qanchalik hurmat qilsa, biz ham Argentinaga shunday javob qaytarishimiz kerak! Men mamlakat haqida gapirmayapman, Messi va uning qilig‘i haqida aytyapman.
Messi menga duch kelib qolmaslikni so‘rab iltijo qilsin”, — deya yozdi “Kanelo”.
Shundan keyin futbol jamoatchiligi, xususan, futbolchilar Serxio Aguero va Sesk Fabregas bokschiga kiyinish xonasidagi vaziyatni tushuntirishga urindi. Biroq Alvares Agueroni ham haqorat qildi.
Oxir-oqibat vaziyatga Meksika terma jamoasi sardori Andres Guardado aralashdi.
“Men Leo qanday inson ekanini bilaman. Afsuski, Alvares kiyinish xonasida nimalar sodir bo‘lishini bilmaydi, shu bois Meksika terma jamoasi libosi yerda yotgani ayrimlarning andishasiga tegganini tushunaman.
Menga bu ahmoqona ishdek ko‘rindi. Bu e’tiborga loyiq vaziyat emas. Bu gaplarning hammasi — nizo yaratish va mashhurlikka erishishga urinish.
Terlashdan keyin nam bo‘lgan libosni polda qoldirsang, uni yuvishga olib ketishadi. Agar u yerda turmasa, uni yuvishga olishmaydi va o‘zing bilan olib ketishingga to‘g‘ri keladi.
Bu libos meniki, biz Leo bilan o‘yindan keyin libos almashdik. Messidan har safar nimadir so‘rasam, futbolka almashish yoki o‘g‘lim bilan suratga tushish, u har doim rozi bo‘ladi. Men ham uning libosini kiyinish xonasining polida qoldirdim, yuvishga olib ketishlari uchun”, — deydi Guardado.
Izoh (0)