Европанинг 7 давлати Украинага қишдан чиқишда ёрдам беришни ваъда қилди

Исландия, Латвия, Литва, Норвегия, Финляндия, Швеция ва Эстония ташқи ишлар вазирлари Украинани қишга тайёргарлик кўриш ва энергетика инфратузилмасини тиклашда қўллаб-қувватлашга ваъда берди. Бу ҳақда Европанинг етти давлати ва Украина ташқи ишлар вазирлари Киевдаги учрашув якунлари бўйича қабул қилган қўшма баёнотида айтилади.

«Биз келгусида гуманитар ёрдам кўрсатиш ва Украинанинг қишга тайёргарлик кўриши, хусусан, Украина энергетика инфратузилмасини тиклаш бўйича саъй-ҳаракатларини қўллаб-қувватлаш тарафдоримиз», — дейилади Украина ТИВ сайтида эълон қилинган қўшма баёнот матнида.

Бундан ташқари, ташқи ишлар вазирлари ўз баёнотларида ғалла ташаббусини кенгайтиришни қўллаб-қувватлаган. Шунингдек, улар киберхавфсизлик ва рақамлаштириш соҳасидаги ҳамкорликни кучайтиришни истамоқда.

Шу билан бирга, баёнотнинг аксарият бандлари Россияга қарши қаратилган. Хусусан, вазирлар санкцияларни кучайтириш ва Россия фуқароларига ЕИга кириш учун визалар беришни чеклаш зарурлигини яна бир бор қайд этган.

Аввалроқ НАТО бош котиби Йенс Столтенберг қишнинг бошланиши Украина учун «даҳшатли» бўлиши ҳақида гапирганди.