Гавайида дунёдаги энг катта Мауна Лоа вулқони отилишни бошлади (фото ва видео)

Гавайи оролларида 40 йил ичида биринчи марта дунёдаги энг катта фаол вулқон — Мауна Лоа отилишни бошлади, деб хабар бермоқда BBC.

Маҳаллий расмийларнинг таъкидлашича, лава ҳали калдера (вулқон ҳудуди)нинг четига чиқмаган ва тоғ этагида яшовчи одамларга таҳдид солмаяпти. Бироқ АҚШ Геология хизмати вазият жуда тез ўзгариши мумкинлигидан огоҳлантирмоқда.

Гавайининг Катта ороли ва унинг атрофидаги сувларга вулқон кули сочилиши эҳтимоли ҳақида огоҳлантирилган ва аҳолига ҳушёр бўлиш тавсия қилинган.

«Кул отилиши туфайли экинлар ва ҳайвонларга потенциал зарар етказилиши, шунингдек, асбоб-ускуналар ва инфратузилмага шикаст етиши ва кўриш даражаси пасайиши мумкин. Агар таъсир кучли бўлса, ҳудудни кулдан тозалашга тўғри келиши мумкин», — деб маълум қилди Гавайи давлат туризм бошқармаси.

Минтақада содир бўлган сўнги силкинишлар, жумладан, 27 ноябрь куни юз берган ўндан ортиқ 2,5 магнитудали зилзилалардан кейин вулқоннинг отилиши эҳтимоли ҳақида бир неча бор огоҳлантирилганди.

Хабарда айтилишича, агар вулқоннинг отилиш баландлиги калдера деворларидан ташқарига чиқса, лава оқимлари тепаликдан жуда тез оқиб тушиши мумкин.

«Бу лава оқимлари камдан-кам ҳолларда ҳаёт учун хавф туғдиради, лекин улар инфратузилма учун ниҳоятда ҳалокатли бўлиши мумкин», — деди Гавайи вулқон расадхонасида ишлаган британиялик геофизик доктор Жессика Жонсон.

Геология хизмати маълумотларига кўра, вулқоннинг биринчи отилиши 1843 йилда ҳужжатлаштирилган, шундан кейин Мауна Лоа яна 33 марта отилган. Охирги отилиш 1984 йилда содир бўлган, ўшанда лава оқими 8 километр узоқликдаги Хило шаҳригача етиб бормаган.