«Сирдарёда бир сўм ҳам ўғирланмайдиган, коррупциясиз тизим яратилиши керак» — Сардор Умурзоқов

Бош вазир Абдулла Арипов ҳамда Президент администрацияси раҳбари Сардор Умурзоқов иштирокида Сирдарё вилоятида бўлиб ўтаётган йиғилишда вилоятни янада ривожнатириш масалаларига тўхталиб ўтилди.

Навоий вилоятига бўлган кечаги ташрифда президент томонидан  5 та янги ташаббус илгари сурилган. Булар:

• электр энергиясини тежаш;
• «Яшил макон» лойиҳасини намунавий ташкил этиш ва шу доирасида далалар бўйида тут ва узум экиш;
• яйловларни ишга солиш орқали эчкичилик ва қўйчиликни кескин ривожлантириш;
• инфратузилма объектлари қурилишида ресурсларни 30 фоизгача тежаш;
• ёшлар билан ишлаш ва уларни ҳар томонлама қўллаб-қувватлаш.

Бу ташаббусларнинг ҳар бири Сирдарёга ҳам бевосита тегишли. Керак бўлса, Навоий вилоятидан ўтиши керак, — дейди Сардор Умурзоқов.

Қайд этилишича, «Яшил макон» дастурини амалга оширишда вилоят намунавий ҳудудга олиб чиқилади. Бунинг учун янги чоралар амалга оширилади:

• барча фермерлар томонидан дала четларига тут ва узум экиш тизими йўлга қўйилади;
• вилоятнинг барча маҳалласида райҳон ва ялпиз экиш, қайта ишлаш ва сотиш намунавий тизими яратилади;
• ушбу ташаббусни амалга ошириш учун барча шароитлар ҳозирланади.

Вилоятда инфратузилма объектлари қурилишида ресурсларни 30 фоизгача тежаш намунасини амалга оширишга масъул ва жавобгар вилоят прокурори ҳисобланади.  Вилоятда бир сўм ҳам ўғирланмайдиган, коррупциясиз, шаффоф тизим йўлга қўйилади.

Умурзоқовнинг таъкидлашича, энг асосий мақсад янги ҳоким барча сектор раҳбарлари билан бир йил давомида вилоятни ишсизликдан холи ҳудудга айлантириши ҳисобланади.

Унга мувофиқ, 2023 йилда қўшимча вилоятда 100 мингта иш ўрини яратилади:

• қишлоқ хўжалигида – 45,2 минг;
• инвестиция лойиҳаларини ишга тушириш ҳисобига – 19,8 минг;
• хизматлар соҳасини ривожлантириш ҳисобига – 22,6 минг;
• янги тадбиркорлик субъектларини ташкил этиш ва «Оилавий тадбиркорлик» дастури доирасида – 12,4 минг.

Аввалроқ Шавкат Мирзиёевнинг тегишли фармони билан Акмал Маҳмудалиев зиммасига Сирдарё вилояти ҳокими вазифасини бажариш юклатилган эди.