Давлат божхона қўмитаси ҳузурида «Божхона-сервис» давлат муассасаси фаолияти ташкил этилади, деб хабар бермоқда Норма.
Маълум қилинишича, 2023 йилнинг 1 апрелига қадар давлат божхона хизмати органлари томонидан олиб қўйилган ва давлат даромадига ўтказиладиган мол-мулкларни электрон савдо платформалари ва савдо ярмаркалари орқали сотиш амалиёти жорий этилади.
Сотиш учун аутсорсинг асосида тадбиркорлик субъектлари жалб этилади ва қабул қилиб олиш, сақлаш ва сотишгача бўлган жараёнларни онлайн режимда мониторинг қилиш имконини берувчи ахборот тизими ишлаб чиқилади.
«Божхона-сервис» давлат муассасасига қуйидаги вазифалар юклатилади:
- давлат ташкилотлари ва декларантлар учун шартнома асосида божхона декларацияси ва бошқа ҳужжатларни тузиш, давлат божхона хизмати органларига тақдим этиш ҳамда товарларга доир божхона расмийлаштируви бўйича бошқа операцияларни амалга ошириш;
- чегара ўтказиш пунктларини назорат-техник воситалар билан жиҳозлаш, уларга сервис хизматлар кўрсатиш ва таъмирлаш, ушбу воситалардан фойдаланганлик учун пулли хизматлар кўрсатиш;
- чегара ўтказиш пунктлари ва уларга туташ ҳудудларда автотураргоҳлар ташкил этиш ҳамда қонунчиликда тақиқланмаган консалтинг хизматларини кўрсатиш;
- давлат божхона хизмати органларига тегишли бўлган бино ва омборларда шартнома асосида божхона омборлари фаолиятини ташкил этиш, божхона омборларида товарларни сақлаш, юклаш, тушириш хизматларини кўрсатиш ҳамда бошқа юк операцияларини амалга ошириш;
- божхона назорати зонасида қурилиш-монтаж ишларини амалга ошириш;
- қонунчилик ҳужжатларида белгиланган тартибда давлат божхона хизмати органлари томонидан олиб қўйилган ва давлат даромадига ўтказиладиган мол-мулкни сақлаш ва сотиш (қонунчилик ҳужжатларида бошқа давлат органларга бериладиган мол-мулклар бундан мустасно);
- шахснинг давлат фойдасига воз кечиш тўғрисидаги қарори асосида олинган товарларнинг қонунчилик ҳужжатларига мувофиқ сотилишини ташкил этиш ва бошқалар).
Мавзуга доир: Йил бошидан бери Ўзбекистонда божхона тўловлари бўйича тушумлар қандай ўзгарди?
Изоҳ (0)